Meles Zenawi “Kama baxayno Soomaaliya…!”

Nairobi (Keydmedia) - Ra’iisul Wasaaraha Dalka Itoobiya Meles Zenawi ayaa sheegay Maanta oo Jimco ah in Ciidankiisa uu kala baxayo Soomaaliya kaliya marka ay AMISOM la wareegto Goobaha ay hadda ka joogaan Dalka.

Meles Zenawi oo qiray markii ugu horaysay in Ciidamadiisa ka gudbeen xadka Soomaaliya ayaa tilmaamay in uu ka rajaynayo AMISOM inay la wareegto oo ay buuxiso goobaha ay ka baxaan Ciidamada Itoobiya, isagoo intaasi ku daray in deg degsiimo aysan ku jiran dowladiisa Askarteeda uga soo saarayso Soomaaliya.

Ra’iisul wasaaraha Itoobiya Meles Zenawi ayaa ka horsheegay hadalkan kulanka Madaxda dalalka Bariga Afrika ee ka dhacaya magaalada Addis Ababa in ay dhici karto in kooxda Shabab ay dib ula wareegto deegaanada dhowaan laga saaray ee gobolka Hiiran haddii aanan la helin Ciidamo buuxiya booska ay ka baxayaan kuwiisa..

Madaxda ugu saraysa ee dowladda Itoobiya ayaa sidoo kale horay u sheegay in joogitaanka hadda ay Ciidamadooda joogaan qeybo ka tirsan Soomaaliya uusan la mid ahayn kii Sanadahii 2006 illaa 2009-kii, iyagoo xusay in kan hadda uu yahay muddo kooban oo ay gacan ku siinayaan TFG-da dagaalka ay kula jirto kooxda Al-shabab.

Sidoo kale Wasiirka Arrimaha Dibadda dowldda Itoobiya Hailemariam Desalegn ayaa sheegay in dalkiisa uu ka fekerayo qabshada Magaalada Baydhobo ee xaruunta gobolka Bay.

Ciidamada Itoobiya oo wata Baabuurta dagaalka iyo hub culus ayaa gudaha usoo galay Soomaaliya bishii October ee Sanadkii tagay, iyagoo la wareegay Magaalada Beledweyne ee xaruunta gobolka Hiiran oo ah Magaalo Istraatiiji ah islamarkaana isku xirta gobolada Koonfureed iyo kuwa Dhexe ee dalka Soomaaliya.

Keydmedia.net - Xafiiska Muqdisho

More News

• Gudoomiyaha Wadajir oo Saakay la toogtay
• Amisom oo loo fasaxay iney Deegaan walba weeraraan & Ciidanka oo la Kordhiyay
• Kooxda Shabaab oo ka baxeen Baydhabo
• Kooxda Al-shabab oo Ganacsade caan ah ku dishay Baydhabo
• Cameron: Ma Qorsheyneyno Aqoonsi Somaliland