DF oo war kasoo saartey Qarax ka dhacay Muqdisho

Khasaaraha dhimashadda ayaa ka badan tirada ay Dowladda sheegtay, wuxuuna gaaraya illaa 8 oo u badan dhalinyaro Soomaaliyeed, oo goobta ku caweynayay.

Warar Keydmedia Online
DF oo war kasoo saartey Qarax ka dhacay Muqdisho

MUQDISHO, Soomaaliya - Dowladda Soomaaliya ayaa cambaareysay qaraxii xalay ee ka dhacay maqaayadda Gelato Divino, oo ku dhaw Isgoyska KM-4, wadada aada dhanka Garoonka diyaaradaha.

Qoraal kasoo baxay Wasaaradda Warfaafinta ayaa lagu sheegay in weerarka ay ku dhinteen 6 qof, iyadoo ay ku dhaawacmeen 8 kale, sida laga soo xigtay Taliska Booliska Soomaaliya.

Khasaaraha dhimashadda ayaa ka badan tirada ay Dowladda sheegtay, wuxuuna gaaraya illaa 8 oo u badan dhalinyaro Soomaaliyeed, oo goobta ku caweynayay xili uu qaraxa dhacayay.

Kooxda Al-Shabaab ayaa sheegatay qaraxii xalay, oo kusoo beegmaya xili maalin kasoo horeysay uu duqa Muqdisho Cumar Filish dil ugu hanjabey Musharaxiinta Mucaaradka.

KEYDMEDIA ONLINE

Commenting is not available in this channel entry.