Dowladda oo AU u gudbineysa dacwad ka dhan ah duqeynta Kenya

Dowladda Soomaaliya ayaa si aada u cambaareysay duqeyntii diyaaradaha Kenya ay ka geysteen Soomaaliya kuwaasoo dad badan lagu laayay.

Warar Keydmedia Online
Dowladda oo AU u gudbineysa dacwad ka dhan ah duqeynta Kenya

MUQDISHO, Soomaaliya - Dowladda Soomaaliya ayaa si adag u cambaareysay duqeymihii diyaaradaha Kenya Khamiistii shalay ka geysteen deegaano ka tirsan gobolka Gedo, taas oo dad shacab ah oo haween iyo caruur ku jirto dhimasho iyo dhaawac ka soo gaaray.

Dowladda ayaa sheegtay in duqeymahaasi ay ahaayeen kuwo aan loo meel dayin oo dad shacab ah lagu beegsaday, waxaana duqeymuhu ay ka dheceen deegaanada Ceel Cadde iyo Hisa-u-gur ee Gobolka Gedo, iyadoo dowladda Soomaaliya ay ku hanjabtay inay dacwad u gudbin doonto Midowga Afrika.

“Weerarkii cirka ee aan loo aabbo yeelin ee ka dhacay Ceel Cadde iyo Hisa-u-gur oo ka tirsan gobolka Gedo, Jubaland State, 3dii Juun 2021, waa tusaalaha ugu dambeeyay ee hawlgallada Ciidanka Difaaca Kenya (KDF) ee keenay dhimashada iyo naafaynta dad rayid ah, oo ay ku jiraan haween iyo carruurta oo si isa soo taraysa u noqdaya astaan ​​aan fiicnayn oo ah hannaanka hawlgalka ee ciidamada cirka Kenya” ayaa lagu yiri war kasoo baxay Wasaaradda Arrimaha Dibada Soomaaliya.

Diyaarad aan duuliye lahayn oo laga leeyahay Kenya ayaa Khamiistii saqdii dhexe duqeyn ka geysatay gobolka Gedo.

Inta la xaqiijiyay waxaa duqeyntaas ku dhaawacmay shan caruur ah iyadoona ay dhimatay hooyadii dhashay caruurtaas.

Cali Axmed Sheekh Cabdi oo ah aabaha qoyska musiibadu ku habsatay, ayaa warbaahinta u xaqiijiyay qasaaraha soo gaaray reerkiisa iyo sida wax u dhaceen.

Sida warar madax bannan ay Keydmedia Online u xaqiijinayaan waxaa jira degaanno kale oo ku yaalla Gedo oo diyaaradaha Kenya ay duqaymo ka geysteen, kuwaas oo qudhoodu uu ka jiro qasaaro soo gaaray shacab xoolo dhaqto u badan.

Ceel-cadde degaan ahaan waxa ay dhacdaa bartamaha gobalka Gedo dhul daaqsimeedka joogiisa sareeyo, waxa ayna dhanka galbeed 60 KM kaga beegantahay magaala madaxda gobalka ee Garbahaareey.

Halkan hoose ka akhriso faafinta rasmiga ah:

KEYDMEDIA ONLINE

Commenting is not available in this channel entry.