Qaraxyo ka dhacay Muqdisho iyo Al-Shabaab oo sheegtay

Muqdisho (KON) - Qaraxyo xoogan ayaa waxay ka dhaceen magaalada Muqdisho kuwaasi oo ay masuuliyadooda ay sheegteen kooxda Al-Shabaab ee ka soo horjeeda dowlada Soomaaliya.

Warar Keydmedia Online
10 December 2012

Qaraxa 1-aad ayaa waxa uu ka dhacay degmada Dayniile ee magaalada Muqdisho gaar ahaan xaafada Gubta halka loo yaqaano goofka shiraaye oo ciidamada dawlada fariisin ku leeyihiin.

Wararka ayaa sheegaya in qaraxa markii uu dhacay ka dib ay xigtay rasaas xoogan oo ay iswaydaarsanayeen ciidamada dowlada dowlada iyo kooxaha weerarka soo qaaday ee Al-Shabaab.

Sidoo kale qarax bambaano ayaa waxa lagu weeraray guri ciidamada Nabad Sugida ka deggan yihiin xaafada Carafaat ee degmada Yaaqshiid halkaasi oo habeenkii afaraad qaraxyo lala beegsanayo.

Wali lama oga inta uu la egyahay qaraxyadaan ka dhacay magaalada Muqdisho ee lagu weeraray xarumaha ciidamada dowlada ay ku leeyihiin magaalada Muqdisho.

Saraakiil uhadashay Al-Shabaab ayaa waxay sheegeen in qaraxyada ka dhacay magaalada Muqdisho ay iyagu ka dambeeyeeen islamarkaana lagu dilay ciidamo katirsanaa dawlada Somalia.

Keydmedia Online - Xafiiska Muqdisho