Riyadii Farmaajo ee doorasho qof iyo cod oo beenowday

Marka la eego heshiiska cusub, waxba kama duwan doorashadii dadbanayd ee ka dhacday dalka 2016, taasoo ku saleysan nidaamka qabiilka ee 4.5, oo wali aan laga gudbin.

Warar Keydmedia Online
Riyadii Farmaajo ee doorasho qof iyo cod oo beenowday

MUQDISHO, Soomaaliya - Waxaa gebi ahaanba fashilmay balan-qaadkii uu Farmaajo u sameeyay shacabka Soomaaliyeed markii la doortay kaasoo ahaa inuu dalka ka qabanayo doorasho qof iyo cod ah 2020-2021.

Shir qaatey 4 maalmood oo Villa Soomaaliya ku yeesheen hogaanka Maamul Goboleedyada iyo Farmaajo ayaa laga soo saarey Maanta war-murtiyeedka lagu shaaciyay in heshiis laga gaarey khilaafkii ka taagna hanaanka doorashadda.

Marka la eego 15-ka qodob ee war-murtiyeedka, waxba kama duwana doorashadda lagu heshiiyay midii dhacday 2016, tusaale ahaan erdadii doorashadda ee ahayd 51 ayaa laga dhigay hadda 101, hal goob oo doorashadda ka dhacday 2016 Maamul kasta, hadda waxaa la dhigay 2 goobood, sidoo kale Baarlamaanka Maamul Goboleedyada wuxuu dooran doonaa Xubnaha Aqalka sare, iyadoo Xildhibaanada Somaliland lagu dooran doono Muqdisho.

Doorashad 2021 waxay lamid tahay tii 2016, sidaasna waxaa daaqada uga baxay riyadii iyo balan-qaadkii beenta ahaa ee Farmaajo, oo maray dhibihii madaxdii ka horeysay, oo ku taariikh noqonayo, hadiiba uusan ka xumanyn.

WAR-MURTIYEEDKA:

1. In Dowladda Federaalka ay magacawdo Guddi Doorasho oo heer Federaal ah kaas oo kaashanaya Guddi Doorasho oo heer Dowlad Goboleed ah.

2. In deegaan doorashooyinka Dowladaha Xubnaha ka ah Dowladda Federaalka laga asteeyo labo magaalo oo ah caasimadaha Gobollada oo ku dhisan yahay Dowlad Goboleed kasta.

3. In tirada ergada Xildhibaan walba u codeynaysa ay noqoto 101 ergo oo mataleysa beesha wadaagta kursigaas.

4. In xulista ergada ay iska kaashanayaan odayaasha dhaqanka, bulshada rayidka ah iyo Dowlad Goboleedka.

5. In qoondada haweenka ee 30% ah la ilaaliyo.

6. In Baarlamaanka heer Dowlad Goboleed ay soo doortaan Xildhibaannada Aqalka Sare.

7. In Xildhibaannada Aqalka Sare ee Soomaaliland ay soo doorataan ergo matasha oo wada jir ah.

8. in doorashada Xildhibaannada labada Aqal ee Soomaaliland ay ka dhacdo magaalada Muqdisho.

9. Qorshaha doorashooyinka dalka waxa uu bilaabanayaa 1-da Nofeembar 2020.

10. In sugidda amniga doorashooyinka ay ka wada shaqeeyaan hay'daha amniga ee Dowladda Federaalka Soomaaliya iyo Dowladaha Xubnaha ka ah.

11. Heshiiskan siyaasadeed waxaa loo gudbinayaa Baarlamaanka Federaalka si ay u meel mariyaan.

12. Madaxdu waxa ay adkaynayaan in xorriyadda hadalku ay tahay lama taabtaan sida ku cad Dastuurka KMG ah iyo Xeerka Saxaafadda ee dalka, sidaa darteed, waa in warbaahinta fursad loo siiyaa in ay si xor ah u tabiso goobaha ay codbixintu ka dhacayso, lagana fogaado wax walba oo ka hor istaagi kara gudashada masuuliyadda kaga aaddan doorashada.

13. Shirku waxa uu uga mahadcelinayaa Madaxda iyo bulshada Dowladda Galmudug sida ay u martigeliyeen shirarkii taariikhiga ahaa ee Samareeb 1-3. Sidoo kale, waxaa ammaan mudan shacabka iyo Maamulka Gobolka Banaadir sidii diirranayd ee ay usoo dhaweeyeen Madaxda Dowlad Goboleedyada iyo wufuuddii la socotay.

14. Waxaan bogaadinaynaa Madaxweynaha JFS Mudane Maxamed Cabdullaahi Farmaajo hoggaaminta kudhisan isku haynta dalka ee uu muujiyay muddadii ay wadahadalladu socdeen, isaga oo xoogga saaray in wadajir iyo wada-ogol lagu dhammeeyo arrimaha doorashooyinka dalka.

15. Ugu dambeyntii, Shirku waxa uu ku bogaadinaayaa Beesha Caalamka kaalinta muuqata ee ay ka geysaneyso dib u dhiska iyo horumarinta dowladnimada Soomaaliya.

KEYDMEDIA ONLINE

Commenting is not available in this channel entry.