Gedo: Saraakiisha Ciidanka oo kala Shakisan, Gaadiid Dagaal oo laga iibiyay Al shabaab

Baled-Xaawo (KON) - Saraakiisha Ciidamada Dowladda Soomaaliya ee ku sugan Degmada Baled-Xaawo ee Gobolka Gedo, ayaa waxaa soo kala dhex galay Shaki ku aadan in qaar kamid Saraakiisha Ciidamadaasi ay la shaqeeyaan Kooxda Al-shabaab.

Warar Keydmedia Online
20 August 2014

Bishaan Agoosto Gudaheeda, ayaa Saddex Gaari oo ah Nooca Dagaalka lagala goostay Ciidamada Dowladda ee ku sugan Degmada Baled-Xaawo, waxaana Gacanta loo galiyay Kooxda Al-Shabaab.

Col. Cabdi Buule Cabdille oo ka mid ah Saraakiisha Ciidamada Dowladda ee Gobolka Gedo oo Keydmedia Online la hadlay, ayaa shaagay in Gaari Dagaal, Nooca Soomaalida u taqaano (Cabdi Bile) Shalay loo gacan galiyay Al-shabaab, waxaana ka dhex-dhashay Ciidanka Kala Shaki weyn oo midba midka kale iska ilaalinayo.

Cabdi Buule ayaa sheegay in Gaariga lala goostay uu ka waday Xerada Ciidanka Beled-Xaaw, sidaasina loogu geeyay Al shabaab. Rag ka tirsan Saraakiisha Ciidamada Dowladda Soomaaliya ayaa ku socda Baaritaano, kadib markii looga shakiyay inay Xariir laleeyihiin Al-shabaab.

“Hore sidoo kale Dad aan ka tirsaneeyn Ciidamada ayaa Gaadiid dagaal kala goostay Ciidamada oo Al-shabaab u Gacan galiyey, waxaas ma dhaceen haddii Saraakiisha qaar ee Ciidanka DFS aysan la lahayn Al-shabaab Xariir hoose oo wadashaqeyn ah”ayuu yiri Cabdi Buule.

Dhamaadkii Sadandkii hore 2013, ayaa Saldhig Ciidan oo ku yaalla Degmada Baled-Xaawo laga siidaayay Sarkaal kamid ah Ajaanibta ka barbar dagaalama Al shabaab, iyadoo Arintaas dhalisay Muran & Tuhun Cirka isku shareeray oo u dhaxeeya Saraakiisha Ciidanka Militariga DFS ee Gobolka Gedo.

Keydmedia Online – Xafiiska Muqdisho