Wasaaradda Gargaarka oo ku socota jidkii wasaaradda Sports-ka

Wasaaradda Gargaarka iyo Maareynta Musiibooyinka, ayaa la soo sheegayaa in ay howlihii muhiimka ahaa istaageen markii madaxa ugu sarreeya ee wasaaradda laga dhigay Marwo Khadiijo Maxamed Diirriye.

Warar Keydmedia Online
Wasaaradda Gargaarka oo ku socota jidkii wasaaradda Sports-ka

MUQDISHO, Soomaaliya - Waxaa durba soo baxaya tabashooyin la xariira habsami u socodka howlaha Wasaaradda Gargaarka iyo Maareynta Musiibooyinka, taas oo la sheegayo in aan wax shaqo ah la qaban tan iyo markii ay xaafiiska timid Wasiir Khadiijo Maxamed Diiriye, oo laga soo badaly Wasaaradda Cayaaraha iyo Dhallinyarada.

Wasiir Khadiijo, oo ku dhawaad afar sano ka shaqeyneysay Wasaaradda Ciyaaraha ayaa ugu danbeyn laga badalay wasaaradda oo aan xarun iyo xaafiis ay ku shaqeyso toona lahayn, isla-markaana ay shaqaaluhu ku jiraan fasax muddo ku dhow labo sano, sida uu sheegay Xamza Siciid Xamza oo kala wareegay xilka dabayaaqadii sanadkii hore.

Xubin firfircoon oo ka tirsan howl-wadeennada Wasaaradda Gargaarka ayaa u sheegay Keydmedia Online, in ay jirto hadal heyn xoogaysatay saacadihii la soo dhaafay, taas oo ku aaddan in Wasaaraddu cagta saartay jidkii fashilka ee Wasaaradda Ciyaaraha.

Shaqsigaan oo aan magaciisa qarinnay wuxuu xusay in shaqaalaha wasaaradda oo ku dhow 130 qof, ay intooda badan fasax galeen tan iyo markii uu xaafiiska banneeyay Xamza, shaqada ugu badan ee wasaaradda laga qabtana ay noqotay, soo dhweyn iyo sii dhaweyn uu wasiirku u sameeyo madax kale.

Waxaa dalka ka jira xaalado bini’aadannimo oo daran sida fatahaadihii uu wabiga Shabeelle, ka sameeyay Hiiraan iyo Shabeellaha Dhexe, iyo abaaraha baahsan ee ku dhuftay Bay iyo Bakool, mana jiro wax gurmad ah oo Wasaaradda Gargaarku sameysay tan iyo markii Marwo Khadiijo la wareegay xaafiiska, marka laga yimaado, deeqo aan buurneyn oo hay’ado caalami ah ay kala daaratay wasaaraddu.

Wasiir Khadiijo, waxa ay caan ku tahay hadallada jawaabaha u badan oo ay baraha bulshada kaga difaacdo Madaxweynaha waqtigu ka dhamaaday ee Soomaaliya, Maxamed Cabdullahi Farmaaajo, halka ay maalmihii na weydaartay u dabaal degeysan Barkhad Jaamac Batuun oo matalaya beelaha la haybsooco, kaas oo ku soo baxay golaha wakiillada Somaliland.

Wasaaradda Gargaarka iyo Maareynta Musiibooyinka, waa mid ka mid ah Wasaaradaha ugu muhiimsan dalka, waxaana dhidibada u mudday Wasiir Maryam Qaasim oo lagu xasuusto in ay xilka iska casishay kadib markii Xukuumaddu musuqday lacag gurmad ah oo loo aruuriyay dadkii ku wax-yeelloobay qarixii 14-kii Oktoobar ka dhacay Muqdisho.

Keydmedia Online waxa ay saddex cisho ka hor baahisay musuq baahsan oo hareeyay wasaradda ciyaaraha, kadib markii ay boob xooggan ku kaceen Khadiijo iyo Xamza oo wasaadda isku badelay, xaiiqda muquqaas ayaana bannaanka yimid kadib markii wasiir Xamza uu sheegay inuu la wareegay wasaarad kaliya magac ahaan jirta oo aan xarun iyo miisaaniyad toona lahayn.

KEYDMEDIA ONLINE

Commenting is not available in this channel entry.