Kooxda Shabaab oo Baardheere Ka Afduubtay Nabadoon Ka Tirsan Beesha Sade

Nabadoonkaan ay xaay hoygiisa kala baxeen Maleeshiyaadka kooxda Shabaab ayaa lagu magacaabi jiray Maxamed Axmed Indha yare  waxaana uu ahaa nabaoonka Beesha Reer Garaad oo ka tirsan beesha Mareexaan Sade.

Lama oga sababta ay Maleeshiyaadka ay ula baxeen Nabadoonka hasayeeshee warar ay Keydmedia u xaqiijiyeen ehelada Nabadoonka ayaa sheegaya in Nabadoonka uu horay u diiday inuu la shaqeeyo kooxda Shabaab taasoo keentay inay markii dambe afduubtaan.

Raq iyo ruux meel lala aaday ilaa hadda lama garanaayo, waxaana aad u wal walsan ehelada iyo qaraabada Naboonka oo sheegay inaysan aqooni meel ay u raadiyaan.

In Ugaasyada, Nabadoonada iyo dadka waxgalka ah bulshada Soomaaliyeed laga laayo waa dhaqanka ay caadeysteen Maleeshiyaadka kooxda Shabaab oo hadda laga sii cirib tiraayo dalka Somaaliya.

Maleeshiyaadka kooxda Shabaab ayaa horay waxaa ay u dileen odayaal dhaqameedyo iyo salaadiin kuwaasoo kasoo kala jeeda gobbolada Jubbooyinka iyo Gedo.

Keydmedia Online -Xafiiska, Kismaayo