Cali Yare iyo koox kale oo shaqada laga raacdeeyay

Madaxweynaha Soomaaliya Xasan Sheekh Maxamuud ayaa caawa magacaabay guddoomiye ku-xigeenada maamulka gobolka Banaadir, in ka badan lix bil kadib markii dib loo doortay 15-kii May 2022.

Warar Keydmedia Online
20 November 2022

MUQDISHO, Soomaaliya - Madaxweynaha Soomaaliya Xasan Sheekh oo tixraacaya soo-Jeedinta Wasaaradda Arrimaha Gudaha, Federaalka & Dib u Heshiisiinta XFS ayaa magacaabay Guddoomiye ku-xigeennada iyo Xoghayaha Guud ee Gobolka Banaadir.

Wareegtada ka soo baxday xafiiska Madaxweynaha ayaa Guddoomiye Ku-Xigeenka Arrimaha Maamulka iyo Maaliyadda loo magacaabay Ciise Maxamuud Guure, waxaana xilkaas hore ugu fadhiyay Cabdiqaadir Maxamed Maxamud(Caana-boro).

Maxamed Axmed Diiriye (Yabooh) waxaa loo magacaabay Guddoomiye Ku-Xigeenka Arrimaha Siyaasadda iyo Amniga, kaasoo uu hore ugu fadhiyay Cali Yare Cali, halka C/Casiis Cismaan loo magacaabay Guddoomiye Ku-Xigeenka Arrimaha Bulshada.

Xasan Maxamed Jimcaale, waxaa loo magacaabay Guddoomiye Ku-Xigeenka Howlaha Guud, halka Faysal Carraale Afrax Xog-Hayaha Guud ee maamulka ee Gobolka Banaadir.

Xeerkan Madaxweyne ayaa waafaqsan qodobbada 87-aad iyo 90-aad ee Dastuurka Jamhuuriyadda Federaalka Soomaaliya iyo Xeer Lr. 6 ee soo baxay 12/02/1980 kuna saabsan in G/Banadir iyo Dowladda Hoose ay hoos yimadaan Madaxtooyada J.F.S.

Xeerkan Madaxweyne ee lagu magacaabay Guddoomiye ku-xigeennada iyo Xoghayaha Guud ee Gobolka Banaadir, ayaa dhaqan galay manta, taas oo ka dhigan in ay Meesha ka baxeen shaqsiyaadkii Farmaajo ku daabnaa ee gobolka hoggaanka u ahaa.

KEYDMEDIA ONLINE