Dagaal ka dhacay degmada Luuq iyo Kooxda Shabaab Al-qaacida oo weerarka soo qaaday

Kismaayo (KEYDMEDIA) - Dagaal xoogan oo saacado badan socday ayaa xalay waxaa uu ka dhacay degmada Luuq ee gobbolka Gedo kaasoo u dhaxeeyay ciidamada TFG-da ee ay gadaal ka joogaa ciidamada amxaarada iyo kuwa kooxda Shabaab Al-qaacida , ayadoona dagaalkaasi uuu ka dhashay khasaaro badan oo soo kala gaaray dhinacyadii dagaalamay.

Warar Keydmedia Online
28 February 2012

Dagaalka xalay ka dhacay degmada Luuq ayaa yimid ka dib markii Maleeshiyaad katirsan kooxda Shabaab Al-qaacida ay hoobiyeyaal kusoo weerareen fariisimo ay ciidamada TFG-da iyo kuwa amxaarada  ku leeyihiin degmada Luuq gaar ahaana nawaaxiga Buundada Luuq.

 Duqeynta ay Maleeshiyaadka Shabaab soo qaadeen kaidb ayaa waxaa xigay dagaal fool ka fool ah oo dhex maray dhinacyada TFG-da amxaarada iyo kuwa Maleeshiyaadka Shabaab waxaana dagaalkaasi oo in badan socday ka dhashay khasaaro soo kala gaaray dhinacyadii dagaalamay.

 Ilaa hadda inta la xaqiijiyay labo askari oo ka tirsan ciidamada TFG-da ayaa ku geeriyooday dagaalkii xalay waxaana ku dhaawacmay in kabadan 7 qof oo isugu jira dhinacyadii dagaalka uu dhexmaray.

 Nin lagu magacaabo Diyaad Cabdi Kaliil oo sheegay inuu ka mid yahay saraakiisha ciidamada TFG-da ee Gedo waxaa uu sheegay in dagaalkii xalay lagu soo qaaday uu ahaa mid gaadmo ah islamarkaana ay fashiliyeen ayna iska caabiyeen Maleeshiyaadkii soo weeraray. Waxaa uu intaasi ku daray inay jab iyo khasaaro badan ay gaarsiiyeen Maleeshiyaadkii soo weeraray inkasoo uusan sheegin tiro cayiman. Maleeshiyaadka kooxda Shabaab Al-qaacida ee dagaalka xalay ku soo qaaday degmada Luuq wali kama aysan hadlin dagaalka.

 Keydmedia.net