Dhaawacyo laga qaadey Muqdisho oo la geeyay Sacuudiga

Wakiillo ka kala socday Xarunta Gargaarka iyo Gargaarka ee Boqor Salmaan, Wasaaradda Caafimaadka, iyo Safiirka Soomaaliya ee Boqortooyada Sacuudiga Saalim Macow Xaaji ayaa bukaannada qaabilay markii ay soo gaareen caasimadda.

Warar Keydmedia Online
22 October 2022

RIYADH, Sacuudiga - Diyaarad siday lix qof oo Soomaali ah oo dhaawac ah ayaa shalay oo Jimce ahayd ka degtay Garoonka diyaaradaha ee King Khalid International Airport, ee magaalada Riyadh, si loogu dabiibo isbitaallo ku yaalla dalka Sacuudiga.

Talaabadan ayaa timid kadib amar kasoo baxay Boqor Salmaan oo ku aadan in la dabiibo dhowr qof oo Soomaali ah oo ku dhaawacmay Qaraxii Argagixiso ee bishii Ogosto lala beegsaday Hoteelka Hayat, ee ku yaala magaalada Muqdisho, kaasoo ay ku dhinteen in ka badan 20 qof.

Wakiillo ka kala socday Xarunta Gargaarka iyo Gargaarka ee Boqor Salmaan, Wasaaradda Caafimaadka, iyo Safiirka Soomaaliya ee Boqortooyada Sacuudiga Saalim Macow Xaaji ayaa bukaannada qaabilay markii ay gaareen Riyadh.

Safiirka Soomaaliya ayaa sidoo kale u mahadceliyey Boqor Salmaan sida degdegga ah ee uu u gurmaday dhaawacyada, isagoo xusay in tani ay muujinayso walaaltinimo iyo xiriirka labada dal inuu yahaymid qoto dheer.

Sidoo kale, Soomaalida dhaawaca ah ayaa si weyn ugu mahad-celiyay madaxda dalka Sacuudiga sida wanaagsan ee ay usoo dhaweeyeen, iyo taageeradda Caafimaad ee u fidiyeen.

Rag hubeysan oo ka tirsan Al-Shabaab ayaa 19-kii Aug, ku weeraray Hotelka Hayat ee magaalada Muqdisho labo qarax oo loo adeegsaday gaari walxaha qarxa laga soo buuxiyay, kadibna gudaha u galeen, taasoo Ciidamada ammaanka ku qaadatay 30 saacadood in ay dib ula wareegaan dhismaha. Weerarka ayaa waxaa ku dhintay ugu yaraan 21 qof, waxaana ku dhaawacmay 117 kale.

KEYDMEDIA ONLINE