KEYDMEDIA ONLINE DIB U HABEYN BAA KU SOCOTA
Bartilmaameed ayey noqdeen inta badan shaqaalaha hay'ada sirdoonka qaranka, kuwaa oo la tuhmayo in ay hayaan xogo la xiriira eeddaha loo heysto hoggaankii hore ee NISA.
MUQDISHO, Soomaaliya- Beegsiga lagu hayo saraakiisha iyo shaqaalaha hay'ada NISA, ayaa maalmahan ku soo cusboonaaday Muqdisho, tan iyo markii la eryey Farmaajo iyo Fahad.
Unug si gaar ah u tababaran, oo fuliya dilalka qorsheysan, ayuu howshan u xil saartay Fahad Yaasiin sida ay sheegayaan xogaha hoose ee aan ka helayno,dadkii ka agdhaweyd muddadii uu falkinayey siyaasadda dalka.
Kooxda oo ku hubeysan bistoolado, ayaa shalay Muqdisho ku dilay sarkaal ka tirsan hay'ada nabad sugida, kaas oo lagu magacaabayey Maxamed Cabdullaahi Garaseey (Sheekh Cajaa’ib).
Ninkan oo aad uga warqabay dhaq dhaqaaqa Fahad xilligii uu ahaa taliyaha NISA, ayaa noqday bartilmaameedka koowaad ee qorshaha lagu ugaarsanayo shaqaalaha iyo saraakiisha ka tirsan hay'ada nabad sugida.
Arrinta shakiga badan dhalineysa ayaa ah, in kooxdii dishay, ay hore uga qaateen, bistooladiisa iyo Computer Labtop ah, kaas oo sida la rumeysan yahay ay ku keydsanayeen xogo badan.
Markii la dilayey sarkaalkan, waxa uu ku socday gaari nooca raaxada ah, wuxuuna dilku ka dhacay suuqa Seybiyaano ee degmada Hodan, xilli uu iibsanayey khudaar.
Qorshahan waa mid lagu raad tirayo, kiisaska denbiyada ee loo heysto Fahad, oo ay ugu weyn tahay arrinta Ikraan Tahliil, waana qorshe ku soo beegmaya waqti hoggaanka cusub ee NISA, uu billaabay baaritaan qoto dheer oo la xiriira denbiyadii dhacay 5-tii sano ee la soo dhaafay.
KEYDMEDIA ONLINE
Add comment
Comments
There are no comments for this entry yet.