Haweenay Walxaha Qarxa wadatay oo lagu Qabtay Deegaanka Hoosingow

Haweenaydaan ayaa la sheegay inay ka tirsan tahay Maleeshiyaadka kooxda Shabaabka, waxaana mar xog waraysi lala yeeshay ay sheegtay in walxaha qarxa ee loo soo dhiibay ay ku qarxin rabtay Ciidamada dowladda iyo kuwa Ciidamada Kenya deegaanka Hoosingow ee gobbolka Jubbada Hoose.

Aadan Ibraahim Dhaqane oo ah Gudoomiyaha Maamulka Dowladda ee Hoosingow ayaa warbaahinta Keydmedia u sheegay inay baaritaano ay hadda ku hayaan haweenayda lagu qabtay walxaha qarxa.

Haweenaydaan ayaa markii la qabanaayay waxaa ay la socotay baabuur xamuul ah kaasoo ka yimid magaalada Kismaayo kuna soo jeeday gobbolka Waqooyi Bari dalka Kenya.

Deegaanka Hoosingow waa deegaan marin ah oo ay istcmaalaan dadka iyo gaadiidka isaga kala goosha gobbolada Jubbooyinka ee Soomaaliya iyo gobbolka Waqooyi Bari Kenya, waxaana Hoosingow uu magaalada Kismaayo u jiraa 180KM.

Keydmedia.net - Xafiiska, Kismaayo