Hogaamiye katirsanaa Al-Shabaab oo isa soo dhiibay

MUQDISHO, Soomaaliya - Warbaahinta dowladda ayaa sheegtay in uu isa soo dhiibay horjooge sare oo kamid ahaa Al-Shabaab, kadib markii uu xiriir lasoo sameeyay Ciidamada DANAB ee ka howlgalaya gobolka Shabeellaha Hoose.

Maxamed Abukar Maxamed Dhagoole, oo gudaha Al-Shabaab looga yaqaaney {Caato} ayaa u qaabilsanaa Kooxda Maaliyaada Gobolka Shabeelaha Hoose, ee Koonfurta Soomaaliya halkaasi oo ay ka socdaan howlgallo ay iska kaashanayaan Ciidanka dowladda iyo kuwa AMISOM.

Taliyaha Guutada 16-aad ee DANAB Ismaaciil Cabdimaalik Maalin ayaa sheegay in horjooge Caato ay soo dhaweeyeen, islamarkaasna ay u gudbin doonaan Hay"adaha ku shaqada leh, ee qaabilsan dhaqan-celinta iyo baaritaanka xubnaha Al-Shaabab kasoo goosta.

Ma jiro wax war ah oo dhanka Al-Shabaab kasoo baxay oo xaqiijinaya ama beeninaya warka isa soo dhiibidda horjoogaha.

KEYDMEDIA ONLINE