Hooyo dhashay lix caruur ah oo lagu dilay Muqdisho

Haweeney dhashay lix caruur ah, ayaa subaxnimadii hore ee maanta lagu dilay Muqdisho.

Warar Keydmedia Online
19 August 2022

MUQDISHO, Soomaaliya- Rag ku hubeysan tooreey ayaa saakay xaafada Raadeerka ee degmada Deyniile ku dilay haweeney dhashay lix caruur ah.

Hooyada tooreyda lagu dilay, ayaa magaceeda lagu sheegay, Qamar Yuusuf Cali, waxaana burcadii dishay, ay doonayeen in ay dhac u geystaan.

Burcada falka geysatay ayaa goobta isaga baxsaday, ka hor inta aanay halkaasi, gaarin ciidamo ka tirsan kuwo degmada Dayniile, oo sameeyey baaritaano aan cidna lagu soo qaban.

Mudooyinkii ugu danbeeyey waxaa kordhayey falalka naxdinta leh, ee ku soo badanaya Caasimadda, waana dhacdooyin muujinaya amni heerka ay mareyso amni darrada jirta.

Maalmo ka hor ayey ahayd markii tooreey lagu dilay, gabar ka mid ahayd ardaydii sanadkan dhameysatay dugsiga sare, wallow dhagar qabihii dilay gacanta lagu soo dhigay.

Shacabka caasimadda ku nool ayaa walaac xooggan ka muujinaya amni darrada sii baaheysa, xilli caawa magaalada ay ka dhaceen qaraxyo lagu weeraray huteel ku yaalla aggagaarka KM4.

KEYDMEDIA ONLINE