Maamulka Degmadda Afgooye oo la isku haysto

Muqdisho (Keydmedia) - Khilaaf ayaa durbaba ka dhashay Maamul Cusub oo dowlada KMG ah ee Soomaaliya ay Shalay u magacaawday Degmada Afgooye ee Gobolka Sh/hoose, taasi oo Maalmo kahor ay kala wareegtay Kooxda Shabab-Al Qaacidda.

Warar Keydmedia Online
30 May 2012

Wareegto kasoo baxday Wasaaradda Arrimaha Gudaha waxa ay ku magacaawday Maamul Cusub oo ay yaalato Degmadaasi.

Agaasimaha Guud ee Wasaaradda Arrimaha Gudaha iyo Amniga Bashiir Max’ed Salaad (Goobe) ayaa Wareegto kasoo baxday Wasiirka Arimaha Gudaha ee dowlada KMG Cabdi Samad waxa uu uga magacaabay Gudoomiyaha Degmada Afgooye C/laahi Cabdi Axmed.

Xildhibaan Cali Afgooye oo ka mid ah Xildhibaanada Barlamanka KMG ah ee Soomaaliya ee kasoo jeeda Gobolka Sh/hoose ayaa waxa uu kasoo horjeestay magacaabista Gudoomiyaha cusub ee Degmada Afgooye, isagoo ku eedeeyay Guddoomiyahan loo magacaabay in uu horay Dambiyo ka baxsan Bini’aadanimada uu uga galay Gobolka.

Madaxweynaha Dowladda KMG ah ee Soomaaliya Sheekh Shariif Sheekh Axmed oo ka hadlay Khilaafkan ayaa sheegay in Maamulka Degmada Afgooye uu yahay mid KMG ah oo aan loo baahnayn in la isku qabqabsado hadda.

Keydmedia.net - Xafiiska, Muqdisho