Muxuu kala hadlay RW Rooble Gollaha Wadatashiga Qaran?

Waxaa looga hadlay arrimo ay ka mid yihiin dardar gelinta doorashooyinka, sida dhameystirka doorashada xubnaha Aqalka sare iyo qabashada doorashada xildhibaannada Golaha Shacabka.

Warar Keydmedia Online
23 September 2021

MUQDISHO, Soomaaliya - Shir u dhaxeeyay Gollaha Wadatashiga Qaran oo ay ku mideysan yihiin Ra’iisul wasaaraha iyo Madaxda Maamul Goboleedyada ayaa xalay ku qabsoomay aaladda Zoom-ka.

Waxaa looga hadlay arrimo ay ka mid yihiin dardar-gelinta doorashooyinka, sida dhameystirka doorashada xubnaha Aqalka Sare iyo mida Xildhibaannada Gollaha Shacabka.

Shirkan ayaa warbixin looga dhageystay guddoomiyaha Guddiga doorashada heer Federal [FIET] Maxamed Xasan Ciro, kaasoo ka warbixiyay habka ay u socoto doorashada xubnaha Aqalka Sare, caqabadaha iyo waxyaabaha lagu dardargelin karo.

Macluumaad ay heleyso Keydmedia ayaa tilmaamaya in Gollaha Wadatashiga Qaran ay isku soo hadal qaadeen in kulan ay isugu yimaadaan, balse lama go’aamin xilliga rasmiga ah ee uu qabsoomi doono kulankaas.

Khilaafka siyaasadeed ee hareeyay mas'uuliyiinta dowladda, ayaa mugdi sii galinaya rajadii doorashooyinka oo aan ku socon habkii ku habboonaa, taas oo loo tiirinayo sida Farmaajo iyo kooxdiisa uga soo horjeedaan inay dhacdo doorasho la mid ah tii uu hoggaanka dalka ugu qabtay si nabad ah horraantii sannadkii 2017-kii.

KEYDMEDIA ONLINE