Muxuu salka ku hayaa safarka RW Rooble ee Baraawe?

RW Rooble iyo wafdi uu hoggaaminayo ayaa umba-baxay magaalada Baraawe, halkaas oo kaga sii horeeyo madaxweynaha Koonfur galbeed Cabdicasiis Xasan Maxamed Lafta-gareen.

Warar Keydmedia Online
3 October 2021

BARAAWE, Soomaaliya – Wafti uu hoggaaminayo Ra’iisul Wasaaraha Xukuumadda Xil-gaarsiinta Maxamed Xuseen Rooble, ayaa dhawaan u ambabaxay magaalada Baraawe ee Gobolka Shabeellaha hoose, halkaas oo ka mid ah goobaha loo asteeyay in lagu qabto doorashada kuraasta Golaha Shacabka ee Baarlamaanka JFS.

U jeedka safarka Ra’iisul Wasaaraha, ayaa salka ku haya, u kuur galidda xaaladaha guud ee degmada, gaar ahaan goobaha doorashada ee magaalada Baraawe, waxaana saacad ka hor magaalada gaaray Madaxweynaha Koofur Galbeed  Cabdicasiis Laftagareen.

RW Rooble, ayaa hore u sheegay inu kormeeri doono xaaladaha guud ee magaaloyinka loo asteeyay doorashooyinka, wuxuu hore hore u booqday magaalooyinka Kismaayo iyo Garbaharrey, waxaana la filayaa inuu dhawaan u socdaalo Jowhar.

“Ra’iisul Wasaaraha XFS Mudane Maxamed Xuseen Rooble ayaa kormeeray garoonka diyaaradaha ee Aadan Cadde, isagoo u kuur galay habsami u socodka howlaha garoonka, ka hor intii uusan socdaal ugu ambabixin magaalada Baraawe”. Ayaa lagu yiri war ka soo baxay xaafiiskiisa.

Ra’iisul Wasaare Rooble, wuxuu u muuqda inuu dadaal xooggan ku bixinayo in ay dalka ka dhacdo doorasho aan dib u dhac danbe lahayn, laguna soo gunaanado xilliga loo asteeyay.

KEYDMEDIA ONLINE