Puntland oo iclaamisay dagaal ka dhan ah Somaliland

Somaliland ayaa qabsatey Caasimada Sool ee Laas-Caanood sanadkii 2007, waxaana xiligaas kadib ay kusii siqeysay magaaladda Garowe, xarunta Puntland.

Warar Keydmedia Online
5 November 2022

BOOCAME, Soomaaliya - Maamulka Puntland ayaa si rasmi ah u iclaamiyay dagaal ka dhan ah Somaliland, kadib markii maalmo kahor lagala wareegay degmada Boocame, ee gobolka Sool.

Taliyaha Ciidanka Difaaca dawladda Puntland, Gen. Abshir Cabdi Jaamac (Abshir London), ayaa sheegay in degaanada dagaalka lagula wareegay ay qoriga caaradiisa kusoo ceshan doonaan.

Wuxuu intaasi ku darey inay Puntland u diyaar-garowdey dagaal ay dib ugu xoreynayso gobolka Sool, oo in badan oo kamid ah ku ku jira hadda gacanta maamulka Gooni Isu-taagga Somaliland.

Hadalkan ayaa sheegay kadib markii Ciidamada Somaliland ay la wareegeen degmada Boocame, ee gobolka Sool, oo qiyaastii 70-KM u jirta magaaladda Garowe, ee xarunta Puntland.

Somaliland ayaa qabsatey Caasimada Sool ee Laas-Caanood sanadkii 2007, waxaana xiligaas kadib ay kusii siqeysay Caasimadda Puntland, waxaana tani ka dhalan karta dagaal qaraar.

Waxyar kadib doorashadii Farmaajo 2017, Somaliland ayaa qabsatay Tukaraq, oo duleedka Laas-Caanod ku yaalla, waxayna xiligaas kahor tageysay inuu Farmaajo gobolka booqdo.

Hadda la wareegista Boocame waxay Somaliland ku doonaysa inay uga hortagto inay degmada ka dhacdo doorashadda Gollaha degaanka Puntland sanadka 2023 laga qaban doono.

KEYDMEDIA ONLINE