Qarax khasaare gaystay oo ka dhacay Shabeellaha Hoose

Wado xiriirisa deggaanada Sabiid iyo Cabdow Dibile, oo hoostaga Afgooye, ayuu maanta ka dhacay qarax khasaare gaystay.

Warar Keydmedia Online
14 August 2022

AFGOOYE, Soomaaliya- Qarax khasaare isugu jira dhimasho iyo dhaawac geystay, ayaa maanta ka dhacay wadada xiriirisa deggaanada Sabiid iyo Cabdow Dibile ee gobolka Shabeellaha hoose.

Qaraxan ayaa ahaa miinada dhulka lagu aaso, waxaana lala eegtay, mooto Fekon, waday askari ka tirsan ciidamada dowlada.

Mootada qaraxa lala eegtay ayaa u kireysnayd askariga, waxaana ku waday darawalkii mootada, oo halkaasi ku geeriyooday, iyadoo uu dhaawacmay askariga.

Dhaawaca askari iyo meydka marxuumkii lahaa mootada qaraxa lala beegsaday, ayaa waxaa goobta ka qaaday ciidamo maqlay jugta qaraxa oo halkaasi ka agdhawaa.

Howl gallo in muddo ah qaatay ayey ciidamadu ka sameeyeen halka uu qaraxu ka dhacay, iyagoo saacado badan hakiyey isku socodka dadka iyo gaadiidka, mana jirto cid ay howl gallasaas ku soo qabteen.

Waxaa si joogto ah wadadan uga dhaca qaraxyo geysta khasaare kala duwan, waana arrin muujineysa fashilka xooggan ee heysta maamulka uu hoggaamiyo Lafta-gareen.

KEYDMEDIA ONLINE