War cusub oo kasoo baxay Xafiiska Farmaajo

Farmaajo ayaa ku guuldareystay inuu qabto Shirka, oo maanta ay ahayd mudadii uu u qabtay inuu ka furmo Caasimada dalka, ee Muqdisho.

Warar Keydmedia Online
18 September 2021

MUQDISHO, Soomaaliya - Cabdirashiid Maxamed Xaashi, madaxa warbaahinta Xafiiska Farmaajo ayaa shaaciyay inuu baaqdey shirkii la filayay inuu Maanta Sep 18 ka furmo Muqdisho.

Shirka oo la flayay inay isagu yimaadaan Gollaha Amniga Qaran, oo ka kooban Farmaajo iyo Madaxda Maamullada, ayaa sida uu sheegay Cabdirashiid dib loo dhigay muda uusan cayimin.

Wuxuu xusay in Xafiiska Farmaajo uu dib kasoo sheegi doono jadwalka cusub ee shirka, kaasoo ujeedka loo qabanayo ahaa inuu Fahad horkeenno warbixin cadeymo wadata oo ku saabsna dilka Ikraan Tahliil.

Farmaajo ayaa ku fashilmay inuu shirka iyo kuwa ka horeeyay uu qabtay, kadib markii Madaxda Maamullada ay soo ajiibi waayeen casuumaadiisa, iyagoo u arka inuu yahay Madaxweyne mudo-xileedkiisu dhamaadey, oo aan ku fadhin wax sharciyad ah.

Madaxda Maamullada waxay shalay sheegeen inay aqoonsan yihiin Rooble, oo isaga kaliya casuumaadiisa ku imaan doonaan, iyadoo dhanka kale ku baaqey in khilaafka jira la dhameeyo, si uusan saameyn ugu yeelan doorashooyinka billowga ah.

KEYDMEDIA ONLINE