Madaxweyne Xasan Sh. oo Caawa ku hoyan doona Kismaayo

Wafdi uu Hogaamiyo Madaxweynaha ayaa Maanta gaaray Magaalada Kismaayo, waana markii ugu horeysay ee uu Madaxweynahu tago Magaalada Kismaayo.

Socdaalkan ayaa waxaa madaxweyaha ku wehlinaya xubno uu ka mid yahay wasiirka arrimaha gudaha iyo amniga Qaranka, Cabdikariin Xuseen Guuleed iyo Saraakil badan.

Madaxweynaha ayaa si heer sare ah looga soo dhaweeyay Magaalada, waxaana la sheegay in uu Kismaayo u tagay sidii uu ula kulmi lahaa Shacabka reer Kismaayo, iyo Maamulka KMG ah ee Jubba.

Afhayeenka Madaxtooyada Eng Yariisow ayaa sheegay in Safarka madaxweynaha uu qeyb ka yahay Safarradii uu ku tagayay Gobollada iyo Degmooyinka Dalka.

Taliyaha Hay’adda Nabad-sugidda, Jeneraal Bashiir Maxamed Jaamac (Bashiir Goobe), Ciidamo badan iyo Saraakiil ayaa Shalay Galab gaaray Magaalada, waxaana la adkeeyay Ammaanka.

Dowladda federaalka ah ee Soomaaliya iyo maamulka KMG ee Jubba ayaa 21-kii bishan ku heshiiyay in wajiga koowaad ee shirka dib u heshiisiinta Jubbooyinka lagu qabto magaalada Muqdisho.

Keydmedia Online - Xafiiska Muqdisho