Xubnaha Gugida Dhismaha Maamulka Gobolada Dhexe oo laga soo celiyay Guriceel

Guriceel (KON) - Maamulka Ahlu Sunna, ayaa Maanta oo Sabti ah u diiday in Xubno kamid ah Gudiga Farsamada Maamul u samaynta Gobolada Galgaduud & Mudug inay galaan Magaalada Guriceel.

Warar Keydmedia Online
7 September 2014

Xubnaha Gudiga oo ka koobnaa 15 Qof, ayaa Maanta dib loogu soo celiyay Garoonka Diyaaradaha ee Aadan Cadde, kadib markii ay Ahlu Sunna ka hor-istaagtay inay ka degeenn Garoonka Magaalada Guriceel, ee Gobolka Galgaduud.

Maamulka Ahlu Sunna, ayaa ku micneeyay Tallaabada ay ugu diideen Xubnaha Gudiga Maamul u samaynta Gobolada Dhexe Labo Sababood oo kala ah 1- In aan lagu soo wargelin Imaanshahooda, 2- In aysan damaanad qaadi karin Amaankooda inta ay Guriceel ku sugan yihiin.

Maamulka Ahlu Sunna waxa uu sheegay sidoo kale in aysan ku qanacsanayn Gugida dhismihiisa & Maamulka loo dhisayo Gobolada Galgaduud & Mudug oo qeybo kamid ah ay maamulaan.

15-ka Xubnood ee laga soo celiyay Maanta Guriceel waxa ay kamid yihiin 27 Xubnood oo ka kooban Gudi loo xilsaaray inay dhisaan Maamul ay ku midaysan yihiin dhamaan Maamulada & Beelaha degan Gobolada Galgaduud & Mudug.

Waxaana Maamulka KMG ah lagu dhisayaa Mudo 45 Maalmood gudahooda Shir ka furmi doono Magaalada Cadaado, ee Xarunta Maamulka Ximan & Xeeb.

Keydmedia Online - Xafiiska Muqdisho