Xukuumadda oo heshay codka kalsoonida

Mudanayaasha Golaha Shacabka ee BJFS oo maanta kulan yeeshay ayaa ansixiyay Golaha wasiirada uu dhowaan magacaabay Ra'isul Wasaare Xamse Cabdi Barre iyo Barnaamijka Xukuumadda.

Warar Keydmedia Online
7 August 2022

MUQDISHO, Soomaaliya – Xildhibaannada Golaha Shacabka ee Baarlamaanka JFS, ayaa ansixiyay Golaha Wasiirada, kulan dhawaan soo idlaaday oo ka qabsoomay Xarunta Golaha Shacabka ee Villa  Hargeisa, kaasoo uu goob-joog ahaa Ra’iisul Wasaaraha Soomaaliya.

Golaha Wasiirrada iyo barnaamijka Xukuumaddaba waxaa ‘HAA’ ku ogolaatay 229-xildhibaan, todobo xildhibaan ayaa diidday, halka uu hal Xildhibaanna ka aamusay, Guddoomiyaha Golaha Shacabka ayaana ku dhawaaqay in Xukuumaddu ansax tahay.

Guddoomiyaha Maxkamada sare ee dalka Baashe Yuusuf Axmed ayaa isla goobta ku dhaariyay xubnaha Golaha Wasiirada ee codka kalsoonida ka helay mudanayaasha Golaha Shacabka ee Baarlamaanka Jamhuuriyadda Federaalka Soomaaliya.

Dhanka kale, todobo Xildhibaan oo intooda badan laga soo doorto Koofur Galbeed, una badan dhallinyaro ay Fahad iyo Laftagareen ku dareen Baarlamaanka ayaa buuq ka dhex kiciyay xarunta Baarlamaanka iyagoo gacan-qaad ku sameeyay guddoonka Golaha.

Ra’iisul Wasaaraha Soomaaliya Xamse Cabdi Barre oo khudbad kooban u jeediyay Mudanayaasha Baarlamaanka ayaa uga mahadceliyay kalsooni siinta Xukuumadda, isagoo balan qaaday in Xukuumaddiisa ay diiradda saari doonta arrimaha hortabinta u baahan.

Tallaabadaan ayaa ka dhigan in waddanku yeeshay Xukuumad rasmi ah, maadaama Xukuumaddii hore muddo ahayd xil-gaarsiin, waxaana dib u billaaban doona howlo muhiim ah oo u xirnaa dhismaha xukuumad sal-fadhisa oo aan ku meel gaar ahayn.

KEYDMEDIA ONLINE