30 sano kadib, Sacuudiga oo dib ugu soo laabtay Soomaaliya

Farmaajo ayaa jaray xiriirka dalalka Sacuudiga iyo Imaaraadka Qatar darteed kadib markii Doha ninka u fadhiya Villa Somalia Fahad Yaasiin uu go'aankaas gaarey.

Warar Keydmedia Online
9 October 2021

MUQDISHO, Soomaaliya - Boqorka dalka Sacuudiga Salman Bin C/casiis ayaa safiir cusub usoo magacaabey Soomaaliya, kaasoo noqonaya midkii ugu horeeyay mudo 30 sano ka badan.

Axmed Bin Maxamed Al-Muwallad ayaa noqonaya Safiirka cusub, waana nin madow ah kaasoo loo soo xulay inuu inuu Sacuudiga u fariisto dalka Soomaaliya, kuna matela diblomaasiyadda.

Safiirka ayaa la filayaa inuu Muqdisho soo gaaro maalmaha soo socda, iyadoo dhanka kale la diyaariyay munaasabada dib loogu furo safaaradda Sacuudiga ee magaaladda Caasimadda ah.

Sacuudiga ayaa mudo ka maqnaa saaxadda diblimaasiyadda Soomaaliya tan iyo 1991, waxaana hadda muuqata inuu aad u daneynayo xiriirka Muqdisho, si saameyn iyo galaangal ugu yeesho doorashadda soo socota oo Qatar iyo Imaaraad ay ku loolamayaan.

Dowladda Soomaaliya ayaa dhawaan safiir cusub u dirtay Sacuudiga kaasoo ah Saalim Macow Xaaji, waxaana warqadaha aqoonsiga ka gudoomay maalmo kahor Boqor Salman.

Farmaajo ayaa jaray xiriirka dalalka Sacuudiga iyo Imaaraadka Qatar darteed kadib markii Doha ninka u fadhiya Madaxtooyadda Villa Somalia Fahad Yaasiin uu go'aankaas gaarey.

Sacuudiga iyo UAE ayaa xiriir taariikhi la leh Soomaaliya, waxayna kaalmooyin siin jireen shacabka mudadii burburka halka Qatar ay timid dalka markii Farmaajo xukunka qabtay.

KEYDMEDIA ONLINE