Al-Shabaab oo laga saarey degmadii ugu dambeysay Shabeellaha Dhexe

Todobaad kahor, Al-Shabaab waxaa laga fara-maroojiyay degmada Aadan Yabaal, oo ahayd xarunta ugu weyn Kooxda oo xafiisyo Canshuuraha iyo Maxkamad ku lahayd.

Warar Keydmedia Online
22 December 2022

MUQDISHO, Soomaaliya - Waxaa Al-Shabaab laga saarey Guud ahaan gobolka Shabeellaha Dhexe, kadib markii Ciidamada la wareegeen magaaladii ugu dambeysay oo ah Ruun-Nirgood.

Afhayeenka Wasaaradda difaaca Jen Caanood ayaa xaqiijiyay qabashadda degmada Ruun- Nirgood, isagoo sheegay in lagu dilay 150 xubnood oo katirsanaa Al-Shabaab, oo 5 ajaaniib ay ku jireen.

Qabashadda degmada Ruun- Nirgood, oo 245-KM waqooyi ka xigta Muqdisho, ayaa timid kadib howlgal maalmo qaatey, oo Ciidanka dowladda iyo dadka degaanka sameeyeen, kaasoo Tuulooyin dhowr ah sidoo kale kula wareegeen.

C/kariin Xuseen Guuleed, Madaxweynihii hore ee Galmudug iyo Wasiirkii Arrimaha Gudaha Soomaaliya ayaa ka hadlay qabashadda degmada, isagoo hambalyo u diray reer HirShabeelle.

Hambalyo reer Hirshabele oo ayagoo isku duuban kaashanayana ciidamada Xoogga Dalka ka xoreystay cadowga argagaxisada ah degmadii ugu danbeysay ee maamulkooda. Degmadaas oo ah degmada Ruun- Nirgood. Waxaana rajeynayaa in deegaanada galbeedka ee maamulka ee ay wali ku sii harsan yihiin haraadiga cadowga deg deg ay oga xoreysan doonaan” ayuu yiri mudane Guuleed.

Todobaad kahor, Al-Shabaab waxaa laga fara-maroojiyay degmada Aadan Yabaal, oo ahayd xarunta ugu weyn oo xafiisyo Canshuuraha iyo Maxkamad ku lahayd, waxaana booqday RW Xamza, oo dhex fariistay Madaxtooyadii Kooxda.

KEYDMEDIA ONLINE