Axmed Madoobe oo la kulmay Safiirka Mareykanka

Axmed Madoobe ayaa xiriirka uu la leeyahay Farmajao xumaa saddexdii sano ee ugu dambeeyay.

Warar Keydmedia Online
11 March 2021

MUQDISHO, Soomaaliya - Madaxweynaha Jubbaland Axmed Madoobe ayaa saakay la kulmay Safiirka Mareykanka u fadhiya Soomaaliya Donald Yamamoto.

Waxay kawada hadleen khilaafka doorashadda iyo sidii Axmed Madoobe uu sameyn lahaa tanaasul ku aadan arinta Gedo oo uu horey u dalbaday in laga soo saaro Ciidanka uu Farmaajo u diray 2020 iyo in lagu wareejiyo maamulka doorashadda Garbahaarey.

"Waxaan kawada hadalnay aniga iyo Safiirka Mareykanka arrimaha doorashadda iyo sidii xal loogu heli lahaa khilaafka ka taagan iyo sidoo kale abaaraha gobolka Gedo," ayuu yiri Axmed Madoobe.

Axmed Madoobe oo ah xudunta khilaafka dalka ka taagan ayaa tan iyo markii Muqdisho soo saarey maalin kahor kula kulmayay xarunta uu ka degan yahay Xalane Mushariixiin ay ku jiraan Xasan Sheekh, Sheekh Shariif, Xasan Cali Khayre iyo CC Warsame.

Muqdisho waxaa la filayaa inay martigeliso shir ay Beesha Caalamka soo qaban-qaabisay oo u dhaxeeya Farmaajo iyo Madaxda Maamullada, kaasoo lagu qaban doono xarunta Afisyooni, oo Feb 8 sanadkii 2017 lagu doortay Madaxweynaha waqtigiisu dhamaaday.

Waxaa la sugayaa Madaxweynaha Puntland Saciid Deni oo aan Muqdisho wali soo gaarin. Lama shaacin xiliga uu furmayo kulanka lawada sugayo.

KEYDMEDIA ONLINE