KEYDMEDIA ONLINE DIB U HABEYN BAA KU SOCOTA
Golayaasha labada Aqal ee Baarlamaanka Jamhuuriyada Federaalka Soomaaliya oo maanta kulan wada-jir ah yeeshay ayaa ansixiyay miisaaniyadda dowladda ee sanadka 2023-ka.
MUQDISHO, Soomaaliya – Golayaasha Baarlamaanka 11-aad ee JFS ayaa maanta Kalfadhiga labaad kulankiisa 4-aad ee wadajirka ah ku ansixiyay Miisaaniyadda sanadka 2023 kadib kulan uu shir guddoominayay Sheekh Aadan Maxamed Nuur (Madoobe).
Kulanka oo ay goob joog ahaayeen guddoonka labada aqal iyo ku-xigeennadooda ayuu ajandahu ahaa akhrinta sedexaad iyo ansixinta miisaaniyadda sanadka foodda nagu soo haya ee 2023-ka. Wadarta guud ee Miisaaniyadda sanadkan ayaana gaartay $973,985,805.
Sida ku cad Miisaaniyadda, xarumaha danta guud sida xarumaha caafimaadka Dowladda, waxbarashada iyo hay’adaha amniga ee dalka ayaa miisaaniyadda loo kordhiyay, 172 Xildhibaan ayaana cod gacan taag ah ku ansixiyay miisaaniyadda sanadka 2023.
Wasiirka Wasaaradda Maaliyada Xukuumada Federaalka Soomaaliya Cilmi Maxamuud Nuur ayaa xildhibaannadda labada aqal ee Baarlamaanka Jamhuuriyadda Federaalka Soomaaliya uga mahadceliyay ansixinta miisaaniyadda sanadka 2023-ka.
Guddoomiyaha Golaha Shacabka ayaa ku dhawaaqay in miisaaniyadda sanadkan ay ansax tahay isagoo guddoonka iyo xildhibaannada labada aqal iyo guddiyadda maaliyadda ee Baarlamaanka uga mahadceliyay ansixinta miisaaniyadda sanadka dhawaan dhalan doona.
KEYDMEDIA ONLINE
Add comment
Comments
There are no comments for this entry yet.