Maxay tahay aafada laga dhaxlay Dagaalkii Guriceel?

Dagaalka markii uu dhamaadey ma jirin miino baaris la sameeyay, waxaana loo faxay shacabka inay dib ugu soo laabtaan guryahooda.

Warar Keydmedia Online
13 November 2021

GURICEEL, Soomaaliya - Dagaalkii bishii lasoo dhaafay ka dhacay magaaladda Guriceel, waxay dadka degaanka ka dhaxleen aafo xanuun badan, oo wali khatarteeda muuqata.

Saddex Carruur ah, oo kasoo jeeda hal qoys ayaa Maanta ku dhintay walxo qarxa oo ay garaacayeen, iyagoo ku ciyaarayay. Waxay dhacdadan ka dhacday Xaafadda Jaamacadda.

Hal canug oo kale ayaa dhaawac kasoo gaarey qaraxa, oo la sheegay inuu ka dhashay xabada Qoriga Sebanka [RPG] loo yaqaano, taasoo wadada looga tagey kadib dagaalka.

Colaadda markii ay dhamaatey ma jirin miino baaris la sameeyay, waxaana loo faxay shacabkii qaxay ee duleedka ku sugnaa inay dib ugu soo laabtaan guryahooda.

Waa mas'uuliyad ay ahayd inay Galmudug kasoo baxdo, oo hubiyo badqabka shacabkeeda, maadaama goob dagaal wax walba laga filan karo, oo Ciidanka dhulka ku aasaan miinooyin.

Guriceel saddex maalin oo dagaal ah ayaa soo marey oo 120 lagu dilay, waxaana colaadda joogsatay markii Ahlu Sunna isaga baxeen, iyagoo fulinaya dalabka Ganacsatada degaanka.

KEYDMEDIA ONLINE