Doorasho Deni afduubtey oo ka dhacday Boosaaso

Lix iyo toban kursi ayaa Maanta lagu doortey, kuwaasoo uu Deni soo xushay, iyadoo laga reebay tartanka Musharixiin dhowr ah, oo uu kamid yahay Wasiirka qorsheynta Jamaal Maxamed Xasan.

Warar Keydmedia Online
5 March 2022

BOOSAASO, Soomaaliya - Waxaa Maanta Boosaaso daqiiqado yar gudahooda lagu soo gabagabeeyay doorashadda 16 kursi, oo kamid ah Gollaha Shacabka, kuwaasoo Puntland matali doona.

Deni oo ah Musharax Madaxweynaha Soomaaliya, ayaa jeebka ku ritay dhamaan Xildhibaanadii Puntland ee BFS, kuwaasoo uu ka dhigtay Wasiiradisa iyo dhalinyaro uu daacadnimo ku xushay.

Waxuu Deni ka reebay tartanka dhamaan shaqsiyaadkii mucaaradka ku ahaa ee uu is lahaa Musharixiin kale ayay u codeynayaan, kuwaasoo uu kamid yahay Wasiir Jamaal, oo Farmaajo ku dhaw.

Xildhibaanada Maanta lagu doortay Boosaaso, oo dhamaan wajiyo cusub ah, ayaa waxaa ku jira taliyihii hore ee Booliska Soomaaliya Jen Bashiir Ameeriko, oo la-taliye u ahaa Madaxweyne Deni.

Xildhibaanada soo baxay waxay kala yihiin:

1. Maxamuud Axmed Aaden Geesood
2. Cabdicasiis Maxamed Maxamuud (Qambi).
3. Bashiir Cabdi Maxamed Ameeriko
4. Marwo Cabdi Bashiir.
5. Muuse Axmed Ismaciil
6. Cali Mahdi Maxamed Qalato, oo Wasiir Jamaal bedelay
7. Maxamed Bashiir Cali
8. Cali Xaaji Daahir Saleebaan
9. Faysal Axmed Maxamuud
10. Sadaam Maxamuud Cabdi
11. Saciid Cali Muuse
12. Maxamed Aadan Diini
13. Caynaanshe Yuusuf Xuseen
14. C/llaahi Faarax Mire
15. Ismaaciil Shire Jaamac
16. Maxamed Cabdi Maxamed

KEYDMEDIA ONLINE