KEYDMEDIA ONLINE DIB U HABEYN BAA KU SOCOTA
Bashiir M. Xersi — Sida caadada ah bil walba, maanta oo kal 01/07 waxaa loo dabbaaldegaa, maalinta XORRIYADDA gobollada koorureed iyo midawga koofur iyo waqooyi.
Munaasabad xushmad iyo maamuus mudan, haddii ay hirgali lahaayeen himilooyinkii loo igmay ama ugu yaraan aan dib loogu laaban lahayn gunnimo kale, kaba muhimsane, haddii dib loo haahaaban lahaan wixii dhumay, wixii dhacay iyo wixii dhinmay, balse, taa ma dhicin, ee waxaa baddalkeed la sii xoojiyey, qaybsanaanta, faquuqa, kala googo’a, kala sii fogaashaha iyo in reer walba dawlad gaar ah noqdo, tuuladiisana uu calal gaar ah ka taagto, haddaba, XORNIMDA sidaa ah.
Aniga Bashiir ahaan ma waxay iga mudan tahay inaan xuso, kaba muhimsane, ma dadka caynkaa ah miyaan garabkooda, guudkooda iyo geeskooda ka soo muuqan karaa anoo XORNIMO xusaya, saa marka ay iga dareeraan ayaa mid walbaa qabiilkiisii, jufadiisii iyo tuuladiisii dabada la galayaaye, anoo diiddan XORRIYAD beenaadkaa, ayaan sanadkii hore (2013) curshay heestan, oo aan markii u horreysay soo bandhigiyo, anoo leh, maanta waa loo bisil yahay, marka loo eego shalay, in kasta oo ay aniga isugu kay mid yihiin, heestu waxay ku billaabatay sidan;
Horta yaa xora?
Yaa xornimo mudan
Oo xaqeed hela
Loo xeraystaa?
ALLA XORNIMEEY
Maxaan ku xusaa?
haddaan xushmo iyo
Xurmo gaariyo
Xil laguu hayn?!
Wallee XORNIMEEY
Xaasidkaa badan
Xigtadaaduna
Xogba ma hayaan
Xigaalo kaleey
Heshiis iyo xeer
La xarriiqdeen!
Xuurto beeniyo
Xaglo Dalabliyo
Xamaasadan jirin
Yey ku xiijine
Runya xamashadu
Maysku xaal baa?.
Xaniif iyo Tuug
Xayraannada tuban
Maysku xaalbaa
Maysku xukunbaa?
Xeebta CURUBiyo
XARAMkii iyo
Hoyga XALANiyo
Xanan Buur iyo
Xaafuun iyo
Xarar dheeriyo
Gal Xinlebi iyo
XAMAR XOR ma tahay?!
XARAR hoos yaal
Oodan XANAFTIIS
Ku xanuunsan
Xarbigiisii
Waad ku xiiqdaye
XOR ma tahay wali?!
XUKUUMADO aan
Xuduudahannaga
Xoog u helinoo
Xaafadaha XAMAR
Xarar yaalliyo
Buulo Xuubeey
Xamarweyniyo
Xirka Hodaniyo
Dhaafin xaruntood
Haw u xiisine!
Ma XOR baa XAMAR?!
Dhul xaraashoo
Oon la kala xigin
Caddaanku xukumo
Madow xaabiyo
Xabaal ka dhigeen
Xornimada taal
Xamxam sheekiyo
Ma XAN uun baa?.
XAWL mariid go’an
XINJIR qubanee
LAFO xarafsanoo
XURMO laga tiray
Kan XUMAANTAA
Kul dul XARRAGOON
Horta ma XORbaa?
Xakiim dheeriyo
Dayday xorodsita
Xabbad mooyee
Aan xal kale hayn
Xerta tuugtiyo
Xukun diidkaa
Xaawoleydiyo
Dumar xaasiyo
Cirroolaha xima
Xumaantuu baday
Yaa ka xaalsiin?.
Haddaan xarig iyo
Xabsi lala dhigin
Oo xisaab jirin
Xornimada taal
Xamxam sheekiyo
Ma XAN uun baa?.
Adoon XARAM tagin
XAJKA soo marin
XAARAAN quute ah
XATOOYO u nool
XALAY dhalay iyo
Xareed loogu mayr
Xariif ma noqdaa?.
Ardadii Xaraf
Xalqo iyo DIIN
Casharro xifdiyey
XUQUUQ ma lahoo
Haddaan XAQba jirin
XORNIMAda taal
Xamxam sheekiyo
Ma XAN uun baa?!
Aqoon xeesheed
Nin xagaa hore
Xaddigeed maray
XALANE u tagey
Qalin iyo xeer
Ku xabeebsaday
Xarafna ka hayn
Xirribya Garaad
Xog iyo ogaal
Xirfadna lahayn
Xisku maran yahey
Horta ma XOR baa?
Qabiillo is xiga
Oo xigsiinna ah
Is ximximayoo
Is xumeeyoo
Is xakaariyey
Xoolo kala dhacay
Oo xawaarayn
Xusuuq iyo layn
Xaal isaga dhigay
Horta ma XOR baa?.
Waa su’aal xiran
Oo xikaayo ah
Hal-xiraaliyo
Sheeka xeel-dheer
Oon xal loo lahayn
Xiska maqalkiyo
Xakamaha geli!
Gobol kala xiran
Degmo xayndaab
Xadad kala loo
Xaabo lagu xiray
Maamul xeeriyo
Xargo goostoo
Xaajo beeloo
Boqol Xaakimi
Midba xeel lehi
Xasaasiyadiyo
Xuurta geliyeen
XOR miyuu noqon?.
Waqooyi xaqiiq
Lixdankii Xamar
Xasuus iyo xilal
Midnimo xuskeed
Xilkeedii dhige
Xabiibnimadii
Xilkasnimadii
Wayska xoortoo
Midaw xadafyoo
Goon ka xagayee
Horta yaa XORA?.
Xornimo nin raba
Isxagxagshiyo
Xiisad muran iyo
Xasarado iyo
Xusulduub beel
Asoon xor ka noqon
XORNIMO ha sugin!
Haddaan xeerkiyo
Xidid dhawrkiyo
Xila gudashiyo
Xuma diidkiyo
Xeerar dhigashiyo
Xaq u dirirkiyo
Xawdka kii wacan
Xareed laga cabin
Xuja gaariyo
Isxagxagashada
Xiisad laga harin
Xalaal quudkiyo
Xirfad lagu socon
XORNIMO ha sugin!
Xaalad lagu jiro
Xayska maanta ah
Rabboo xasilshoo
Xaqu soo dego
Oo la soo xulo
XEER beegtiyo
Xoon Garaaddaa
Haddaan XAALIYE
Xalaala la helin
XORNIMO ha sugin!
Haddaan xaajiyo
Xanaanayn iyo
Xamdi gaariyo
Xanaf li’i iyo
Xasanaado iyo
Xalaal quud iyo
Xirfad lagu socon
Xornimo ha sugin!
Xayska eraygiyo
Xa’da maansada
Haddaan soo xiro
Qofbow xaalkaa
Bulshoy xeerkaa
Iyo xeradaa
Ama xididkaa
Iyo xiinkaa!
Adoon XARAF jaban
XAFLADO ka tirin
Xuurto iyo hees
Ha ku xiiqine
XIS shaqeeyoo
Xasuustii hore
XABADka ku haya
Xaaladaha jira
Isku xiri karin
Xagaagii hore
Xalka maanta ah
Xoorka aan sugi
Adoon xaalayn
Oon xuskeed baran
Haysku xaadirin!
Bashiir M. Xersi
brdiraac@hotmail.com
[url=http://bilediraac.wordpress.com/]http://bilediraac.wordpress.com/[/url]
Add comment
Comments
There are no comments for this entry yet.