Howlgal ka billowday Sh/Dhexe kadib weerarkii Ceel-Baraf

Weerarka degaanka Ceel-Baraf ayaa la sheegay in lagu dilay ugu yaraan 30 askari oo u dhashay dalka Burundi, iyadoo ay jiraan kuwa kale oo wali nolosha lagu la'yahay.

Warar Keydmedia Online
5 May 2022

CEEL-BARAF, Soomaaliya - Ciidamada Midowga Afrika ee ATMIS iyo kuwa dowladda Soomaaliya, ayaa howlgallo ka billaabey duleedka Ceel-Baraf, kadib weerarkii lagu laayay Askarta Burundi Subixii Talaadada.

Wararka ayaa sheegaya in Ciidamada huwanta ah ay isku dayayaan inay dib ula wareegaan saldhiigii la weeraray, oo Al-Shabaab ku sugan, waxaana dadka degaanka ay muujinayaan cabsi dagaal.

Al-Shabaab ayaa saldhigga cagta marisay kadib weerar ku billowday qaraxyo baabuur, kuwaasoo dhaliyay khasaaro badan, oo askarta Burundi soo gaartay, waxaana illaa sii kordhaya dhimashadda.

Dagaalyahanada Al-Shabaab ayaa adeegsaday saddex gaari oo walxaha qarxa laga soo buuxiyay, oo mid ka mid ah uu ku dhacay meel god ah. Waxay qarxiyeen labo gaari oo kale oo kuwa xamuulka ah, oo saarnaa ilaa 20 kiilogaram oo walxaha qarxa ah.

Kadib qaraxyada, ku dhawaad 450 dagaalyahan ayaa xerada galay. Xogaha KON heshay ayaa sheegaya in qaraxyada ismiidaaminta ah ay geysteen khasaaraha ugu badan.

Sargaalka u hadlay Burundi ayaa VOA u sheegay in askarta ATMIS ay hayeen xog sirdoon oo sheegaysa in xoogaga Al-Shabaab ay isku uruursanayeen tuulo u dhow Ceel-Baraf, 48 saac ka hor weerarka.

Ciidanka Burundi ayaa u diyaar garoobay sidii ay isaga difaaci lahaayeen, iyagoo dhufeysyo qotay. Laakiin, qaraxyada ay ku rideen argagax, keenay inay kala cararaan.

KEYDMEDIA ONLINE