Khasaare ka dhashay Qarax ka dhacay Shabeelaha Hoose

Qarax Miino ayaa barqanimadii maanta ka dhacay, inta u dhaxeysa degmada Afgooye iyo magaalada Mareereey, ee gobolka Shabeellaha Hoose.

Warar Keydmedia Online
20 February 2022

AFGOOYE,Soomaaliya - Qarax Miino ayaa maanta lala beegsaday Mooto nooceedu yahay FEKON, taas oo ay saarnaayeen laba askari oo ka tirsan ciidamada dowladda Soomaaliya.

Labada Askari ayaa ka yimid dhanka Magaalada Mareereey, iyagoo ku sii jeeday Degmada Afgooye ee gobolka Shabeellaha Hoose.

Qaraxa ayaa waxaa ku dhaawacantay labadii askari ee Mootada saarnaa, waxaana dhaawacooda la keenay magaalada Muqdisho, halkaas oo lagu dabiibayo.

Goobta uu qaraxu ka dhacay, waxaa iminka ku sugan ciidamo ka tirsan dowladda kuwaas oo wada baaritaano ay ku raadinayaan kuwii qaraxa ka danbeeyey.

Ma Jirto cid sheegatay masuuliyada weerarkan miino, waxaase looga bartay kooxda Al Shabaab, oo dagaal kula jirta nidaamka dowladnimo ee Soomaaliya.

KEYDMEDIA ONLINE