Musharixiinta mucaaradka oo la kulmay Beesha Caalamka

Kulanka ayaa diiradda lagu saarey sidii loo dedejin lahaa doorashadda Soomaaliya, iyadoo Mucaaradka ay caddeeyeen mowqifkooda inay doonayaa hanaan hufan oo loo dhan yahay.

Warar Keydmedia Online
10 November 2021

MUQDISHO, Soomaaliya - Midowga Musharixiinta Mucaaradka, ayaa Maanta la kulmay Wakiiladda Beesha Caalamka, oo ay kawada hadleen arrimo la xiriira doorashadda Soomaaliya.

Kulanka oo ka dhacay Xalane ayaa waxaa ka qeybgalay Sheekh Shariif, Xasan Cali Khayre iyo Musharixiin kale, kuwaasoo Safiiradda ajnabiga la wadaagey dareenkooda doorashadda.

waxay sheegeen in daaha iyo dib u dhaca doorashadda ay ku abuurtey walaac wayn, maadaama hanaanka sii jiitamaya uu keenay inay ka niyad-jabaan, islamarkaana rajadooda yaraato.

Beesha Caalamka ayaa dhankooda muujiyay walaacaas oo kale, iyagoo tilmaamay in hadii aan doorashadda lasoo afjarin kahor inta uusan 2021 dhamaan ay joojin doonaan taageeradda.

Kulanka ayaa kusoo dhamaadey si wanaagsan oo is-fahan ah, iyadoo musharixiinta balan-qaadeen inay qeyb ka noqdeen dadaallada lagu qabanayo doorasho hufan, oo xor iyo xalaal ah.

Jimcihii lasoo dhaafay, Saaxiibadda Beesha Caalamka ayaa ugu baaqey Madaxda DF iyo Maamullada inay si dhaqso ah ku qabtaan doorashadda Aqalka Hoose oo 273 kursi ka harsan.

KEYDMEDIA ONLINE