Weerar ku billowday qarax oo ka dhacay G/Hiiraan

Degaanka ayaa maalmo kahor laga saarey Al-Shabaab, iyadoo hadda ay gacanta ku hayaan Ciidamada dowladda iyo dadka degaanka ee hubeysan.

Warar Keydmedia Online
29 September 2022

BELEDWEYNE, Soomaaliya - Qarax iyo dagaal isla socda ayaa maanta ka dhacay degaanka Ceel-Qooxle oo ku dhaw degmada Moqokori ee gobolka Hiiraan, halkaasoo howlgallo ka socdeen maalmihii lasoo dhaafay.

Al-Shabaab ayaa weerarka soo qaadey, iyadoo bartilmaameedsatay goob ay ku sugnaayeen Ciidamada dowladda iyo Malleeshiyadda Macawiisleey, waxaana ay ku dishay askar iyo dad kale oo Nabadoon kamid yahay.

Ciidamada ayaa iska caabiyay kuwa weerarka kusoo qaadey, iyadoo xaaladda degaanka wali ay kacsan tahay, oo dhaawacyo iyo meydadka goobta laga soo qaadayo, waxaana la ogeyn tirada khasaaraha illaa hadda.

Waxaa jira warar sheegaya in weerarka uu ku dhintay Nabadoon caan ka ahaa Hiiraan oo lagu magacaabi jiray Cimi Hagar Guure, oo katirsanaa dadkii degaanka ee hubka u qaatay Kooxda Al-Shabaab.

Degaanka ceel-Qooxle, ayaa maalmo kahor laga saarey Al-Shabaab, iyadoo hadda ay gacanta ku hayaan Ciidamada dowladda iyo dadka degaanka ee hubeysan.

KEYDMEDIA ONLINE