Yaa kusoo baxay doorashadda Jubbaland?

Axmed Madoobe ayaa gacantiisa kusoo xulay dadka u tarmay kuraasta 8-da ah ee Jubbaland ku leedahay Aqalka Sare.

Warar Keydmedia Online
21 October 2021

KISMAAYO, Soomaaliya - Afar Senator oo ka harsanayd 8-da kursi ee Jubbaland ku leedahay Aqalka Sare ayaa Maanta lagu doortay Kismaayo, kuwaasoo labo kamid ah dumar yihiin.

Doorashadda oo ka dhacday xarunta Baarlamaanka, ayaa waxaa codeeyay Xildhibaanada Jubbaland, kuwaasoo dhaqaale badan ka sameeyay codka ay siiyaan Musharixiinta BFS.

Kursiga 1aad waxaa ku guuleystay Xasan Daahir Yarow oo ka adkaaday Cabdi Xuseen Cali, halka Ibraahim Awgaab uu garaacey isna Farxiya Macalim si uu ugu fariisto kursiga lixaad.

Labo haween ah ayaa u tartamay kursiga 7aad, kuwaasoo kala ah Layla Nuur Maax iyo Xareedo Maxamed Sheekh. Xareedo ayaa kusoo baxday doorashadda.

Kursigii 8aad oo isna haweenka loo xiray ayaa waxaa ku guuleysatay musharax Maryan Faarax Kadiye oo ka adkaatay Samsam Maxamed Bishaar.

Axmed Madoobe oo gacantiisa kusoo xulay dadka u tarmay kuraasta 8-da ah ee Jubbaland ku leedahay Aqalka Sare, ayaa Madaxtooyadda ku qaabiley afarta Senator ee la doortay.

Waxaana halkan kusoo dhamaadey doorashadda kuraasta Jubbaland ee Aqalka Sare, taasoo mudo labo bilood ah dib u dhac ku imaanayay, sababo la xiriirka khilaafka siyaasadeed.

KEYDMEDIA ONLINE