KEYDMEDIA ONLINE DIB U HABEYN BAA KU SOCOTA
Deggaano ka tirsan Dowlad deggaanka Soomaalida Itoobiya ayuu iminka ka soconayaa dagaal u dhaxeeya Al Shabaab iyo Liyuu boolis.
JIGJIGA, D.D.Soomaalida- Sida ay sheegayaan goobjoogayaal ku sugan aagga Huluul ee degmada Hargeelle gaar ahaan Gol-dheer, waxaa galabta degmadaas ka billawday dagaal u dhaxeeya Al-Shabaab iyo Ciidamada Liyuu boolis.
Dhinacyada ayaa isku adeegsanaya hubka noocyadiisa kala duwan, iyadoo dhawaqa rasaasta laga maqlayo inta badan deggaanada hoostaga degmada Hargeelle.
Dadka rayidka ee ku sugan meelaha uu dagaalku ka socda, ayaa ka barakacay guryahooda, waana kuwa muujinaya cabsi aad u fara badan.
Dagaalkan ayaa daba jooga weeraro culus oo ay Al-Shabaab ku qaadeen deggaanada Yeed iyo Aato, oo ku yaalla xad beenaadka Itoobiya iyo Soomaliya.
Wixii intaas ka danbeeyey dirirta ayaa noqotay mid xiriir ah, waxaana ka dhashay khasaare kala duwan oo isugu jira dhimasho iyo dhaawac, inkastoo ilaa iyo iminka aan la heynin tiro sugan.
Labada dhinac ayaa guulo ka sheeganaya dagaalka socda, mana jirto cid madax bannaan oo xaqiijin karta rasmi ahaanshaha wararka ka soo baxaya Al-Shabaab iyo saraakiisha Liyuu boolis.
Duullaanka Al-Shabaab ay ku qaadeen deggaanada Soomaalida Itoobiya ayaa keeneysa walaac hor leh oo ku saleysan amniga gobolka, oo mudooyinkii ugu danbeeyey aan caga badan ku taagneyn.
KEYDMEDIA ONLINE
Add comment
Comments
There are no comments for this entry yet.