Howlgal amni oo laga fuliyay Jowhar [Sawirro]

Howlgalka ayaa la sameeyay Xalay fiidkii, wuxuuna kusoo beegmay xili labo qarax ay ka dhaceen Balcad oo aan ka fogeyn magaaladda Jowhar.

Warar Keydmedia Online
4 January 2021

JOWHAR, Soomaaliya - Ciidamada booliiska Soomaaliya ee sida gaarka ah u tababaran ee Haramcad, ayaa howlgallo amni xaqijin ah xalay ka fuliyay magaalada Jowhar, ee Caasimadda Maamulka Hirshabeelle.

Howlgalka oo laga sameyay xaafadaha magaalada ayaa la arkayay Ciidamada Haramcad oo gaaf waregayay xaafadaha Magaalada, oo lagu wado inay dhawaan marti-geliso doorashooyinka Baarlamaanka ee lagu muransan yahay.

Qaar ka mid ah Saraakiisha howlgalka hogaaminaysay ayaa sheegay in la baadi goobayo xubna katirsan Al-Shabaab oo falal Amni darro ah ka fulinaya Caasimadda maamulka Hirshabeelle ee Jowhar.

Howlgalka Jowhar ayaa yimid kadib markii shalay labo qarax ay ka dhaceen afaafka xarunta maamulka degmada Balcad, kuwaasoo ay ku dhinteen 3 qof, 6 kalena ay ku dhaawacmeen.

KEYDMEDIA ONLINE