Imisa Al-Shabaab looga dilay weerarka ay ku qaadey Itoobiya?

Labada dhinac ayaa kala sheegtay guulo kala duwan, waxaana jirin ilo madax-banaan oo xaqiijinaya khasaaraha dhabta ah ee dagaalka.

Warar Keydmedia Online
23 July 2022

YEED, Soomaaliya - Dagaal culus oo labo maalmood socday ayaa ka dhacay degaanno ku yaalla gudaha iyo xadka Itoobiya, kaasoo yimid kadib markii Al-Shabaab weerartay saldhigyada Liyu boolis ku leeyihiin meelo ay ku jiraan Yeed iyo Caato, oo Bakool katirsan.

Saraakiisha Liyu boolis ayaa sheegay inay ku dhawaad 100 xubnood uga dileen Al-Shabaab weerarka, waxayna soo bandhigeen hub aad u badan oo ay sheegeen inay ka furteen argagaxisadda.

Al-Shabaab ayaa dhankeeda sheegtay inay 87 askari oo Liyu boolis ah ay ku dishay weerarka. Wali ma jiraan illo madax-banaan oo xaqiijnaya sheegashadda labada dhinac ee dagaalamay.

Kooxda Al-Shabaab ayaa markii ugu horeysay weerartat gobolka Afdheer oo kamid ah dowlad degaanka Soomaalida dalka Itoobiya, halkaasoo ay Ciidamada kula galeen dagaal socday in ka badan 48 saacadood.

KEYDMEDIA ONLINE