Yaa xulaya Ergada dooranaysa kuraasta Somaliland?

Rooble ayaa lagu eedeeyay inuu la saftay ku xigeenkiisa Mahdi Guuleed, oo raba in isaga looga dambeeyo doorashadda kuraasta Somaliland.

Warar Keydmedia Online
1 September 2021

MUQDISHO, Soomaaliya - Kuraasta loo qoondeeyay Somaliland waxay xujo ku noqdeen Rooble, kadib markii uu khilaaf ka dhex billowday labada Mas'uul ee ugu sareysa siyaasiyiinta kasoo jeeda Gobollada Waqooyi, Cabdi Xaashi iyo Mahdi Guuleed.

Isku dayo badan iyo shirar isdaba-joog ah, wuxuu RW Rooble ugu dambeyntii go'aamiyay in Ergada ay si siman usoo xulaan Mahdi Guuleed iyo Cabdi Xaashi, isna uu dusha kala socon doono in la ilaaliyay nidaamkii loo dejiyay doorashadda.

Somaliland ayaa laga siiyay Aqalka Sare 11 kursi, waxaana loo kala qeybiyay saddex meelood, Cabdi Xaashi, Mahdi Guuleed iyo Xafiiska Ra'iisul Wasaaraha oo mid kasta wata Musharixiin.

Waxaa jirta in wali aan xal laga gaarin khilaafka gudiga SEIT ee Somaliland, kaasoo labo garab ukala jabay, waxayna kala doorteen labo guddoon oo iska soo horjeeda.

Cabdi Xaashi garabkiisa ayaa ku eedeeyay Rooble inuu la saftay dhnaca Mahdi Guuleed, taasina ay cadeyn u tahay in Villa Somalia dooneyso inay boobto kuraasta Somaliland.

Kuraasta Somaliland waxaa lagu dooranayaa Caasimadda, si lamid ah kuwa Banaadiriga, iyadoo hadda wali heshiis rasmi ah laga gaarin kala qeybsanaanta siyaasiyiinta G/waqooyi.

KEYDMEDIA ONLINE