Maxay ahaayeen Qaraxyadii Maanta laga maqlay Muqdisho?

Xerada AMISOM ee Xalane ayaa laga maqlayay qaraxyada, kuwaasoo markii dambe la ogaadey inay ahaayeen hubka Ciidanka Midowga Afrika tijaabinayay.

Warar Keydmedia Online
28 February 2022

MUQDISHO, Soomaaliya - Jugta qaraxyo waaweyn, oo laga maqlay qeybo badan oo kamid ah Muqdisho ayaa cabsi ku beeray shacabka, maadaama ay jireen digniino la xiriira weeraro Al-Shabaab.

Xafiiska warqabadka Keydmedia ee Muqdisho, ayaa baaritaan ku sameeyay qaraxyada, waxaana wariyeyaasha KON kusoo waramayaan inay ahaayeen hub culus oo AMISOM tijaabinaysay.

Dad badan oo ku nool nawaaxiga Garoonka diyaaradaha ayaa u maleeyay inay hoobiyeyaal kusoo dhacayaan xerada Xalane ee AMISOM, oo horey dhowr jeer madaafiic Al-Shabaab ugu soo riday.

AMISOM dadka kuma waregliso marka ay tijaabada hubka sameynayso ama ay qarxinayso bambooyinka laga so qabtay Al-Shabaab, taasoo markasta abuurta dareen cabsi iyo argagax amni.

Xerada Xalane waxaa sidoo kale tijaabooyin hub ka sameeya Ciidanka Mareykanka uu tababarey ee Alpha Group iyo Gaashaan, kuwaasoo meel u dhaw Garoonka dhanka badda layli ku sameeya.

Dadka Muqdisho waa dareen ku joog, oo mar kasta filanaya qarax, maadaama nolol maalmeedkooda uu qeyb ka noqdey oo mudo sanado ah usoo joogeen weeraro dad badan ku dhinteen.

KEYDMEDIA ONLINE