Qaraxyo ku jira Gudaha Muqdisho

Qaraxyadan ayaa la sheegay in gudaha caasimadda soo galeen bilawgii bishan, markaasoo tiradoodu ay ahayd ilaa 11, waxana ilaa iminka dhacay 3 halka 8 kalana ay harsan yihiin.

Warar Keydmedia Online
30 November 2021

MUQDISHO, Soomaaliya - Sida ay sheegayaan xogaha ay helayaan laamaha amniga DF, waxaa gudaha Caasimadda ku jira ku dhawaad 8 qarax, kuwaasoo lala damacsan yahay in lagu weeraro huteello caan ah iyo xarrumo dowladdeed.

Dadka Muqisho ayey arrintan argagax weyn ku beertay markii ay ogaadeen, iyadoo lagu hadal-hayo goobaha ay bulshada isugu timaado iyo baraha bulshadda.

Qaraxyadan ayaa la sheegay in gudaha Muqdisho lasoo galiyay bilawgii bishan, markaasoo tiradoodu ay ahayd ilaa 11, waxaana lagu fuliyay weerar 3 halka 8 kalana ay harsan yihiin.

Inkastoo aan si toos ah loo shaacin halka lagu hayo qaraxyada, misana xubno ka tirsan Hay'adaha amniga ayaa fariintan gaarsiiyey qeybaha bulshada, si ay u muijyaan feejignaan.

Waxaa durbadiiba yaraaday dhaqdhaqaaqa shacabka Magaalada, iyadoo qof walba uu isku dayayo inuu ka badbaada dhibaatada qaraxyada, ee aan la ogayn waqtiga ay dhacayaan.

Marka laga yimaado  qeyb kamid ah shacabka oo guryahooda ku nagaaday, filashada qaraxyada ayaanan saameyn ku yeelan ganaciga, iyadoo la ogsoon yahay in shacabka ay qaraxyada wehel u ahaayeen 11-kii sano ee ugu danbeysay, islamarkaana yihiin kuwa muujiyey dhabar adeeg fara badan.

Qaraxyada ismiidaaminta ee ka dhaca Muqdisho ayaa inta badan waxyeelo u gaysta dadka rayidka ah ee aan waxba galabsan, kuwaasoo qaraxyada ka dhaxla khasaare isugu jira dhimasho, dhaawac iyo bur-bur hantiyeed.

KEYDMEDIA ONLINE