Toddoba qof oo isku qoys ah oo lagu dilay Waajid

Waxay dadka degaanka ay sheegeen in weerarka uu ahaa mid argagax ku abuuray shacabka, maadaama ay khatar ugu jiraan inay bartilmaameedsato Al-Shabaab.

Warar Keydmedia Online
25 November 2020

WAAJID, Soomaaliya - Kooxda Al-Shabaab ayaa xalay saqdii dhexe ku dishay degmada Waajid ee gobolka Bakool 7 ruux oo ka kooban hal qoys, kuwaasoo isagu jiray hooyo, aabe iyo 4 caruur ah oo ay dhaleen iyo qof marti u ahaa.

Mukhtaar Axmed Xasan, oo ah gudoomiye ku xigeenka degmada ayaa sheegay in falkan uu ahaa mid arxan-darro ah, oo argagax geliyay bulshadda ku dhaqan gobolka, iyadoo uu Madaxweynaha Koonfur Galbeed Lafta Gareen cambaareeyay.

Madaxweynaha ayaa shacabka Koonfur Galbeed ugu baaqey inay meel uga soo wada jeestaan gumaadka Al-Shabaab, isagoo tilmaamay in hadii laga aamuso Kooxda ay geysanayso dilal iyo qaraxyo nafta bini'aadamka ku goynayso.

Lama oga sababta ay Al-Shabaab u beegsatay guriga, balse Saraakiisha amniga ayaa xusay in ay ka jawaabi doonaan xasuuqa shacabka loogu geystay Waajid, oo kamid ah meelaha laga saarey Al-Shabaab 2014.

Ma jiro wax war ah oo kasoo baxay Al-Shabaab, oo ku saabsan dilka dadka rayidka ah. Ciidamada dowladda iyo kuwa AMISOM ayaa wada howlgallo ay Al-Shabaab uga saarayaan degaanda ay maamusho ee gobolka Bakool.

KEYDMEDIA ONLINE