?  Dumarku Waa Calansidaha Ummadda!

Prof. Mohamoud Iman Adan - Keydmedia Online — Cadaw ma laha oo Dumarku waa Calansidaha Ummadda Soomaaliyeed. Waa kuwa dhaliya xiriirka ehelnimo iyo isku dhafka bulsho. Waa macallinka afbara ubadka, haddana barbaariya. Waa ilaaliyaha Hantida iyo hab-waanaag Maamulka Qoyska.

Faallo Keydmedia Online
8 March 2014

Waa kalkaaliyaha ragga iyo taakulaynta deriska. Maaraynta hufan, bilicda san iyo baraaraha qoysku gaaro iyagaa dhaliya, haddana ammaanta raggaa isa siiya. Sidatanu xaq-soor bulsho ma ahan ee caddaalad-xumada dumar lagu hayo dib haloogu noqdo

Bulshada & Meekhaanka Dumarka

Dumarku waa udub-dhexaadka bulshada Soomaaliyeed. Kala guursashada iyo xididnimada ayaa ummadda isaga dhiga ul iyo diirkeed, iyagaana ammaantaas iska leh. Gabadhu beel way ka dhalataa mid kale way u dhaxdaa ayadaana gunudda xiriirka laba qoys, labo reer iyo labo beelood.

Hormuudnimada hooyada waxaa markhaati cad u ah inay jiraan beelo ku abtirsada magacii hooyadood, haddana beel kale kasoo jeedday. Isir-wadaaggu ma dhinto oo muddo dheer buu soo taxnaadaa, wax badan ayaana laysugu taraa. Abaalka dumar bulshada u galo ma loo tixgeliyaa?

Dumarka & Halgankii Xornimo doonka

Dumarku xubno kuma lahayn dhallinyaradii 13kii SYL oo Hoggaanka u hayey gobonimadoonkii lagu guulaystay, haddana halgankoodu halkaas kama maqnayn. Xilqaadnimada iyo xaas-walwaalidnimada qoyska ka sokow, Qayb libaax baa dumarku ka qaateen halganka gobonima doonka oo qaatay muddo 17 Sano. Dhiiggoodii, waqtigoodii iyo hantidoodii bay u hureen waana dhaliyeen goolkii xornimada. Haddii dumar halgankaas ka maqnaan lahaa, haddii abaabulkooda iyo mashxaraddoodu goleyaasha SYL ka jiri lahayn, haddii caraadintooda iyo taakulayntoodu ay gaabin lahayd, gobanimadooniddu ma laxaadsateen. Libinta gobanimada lagu dhaliyy rag gaar uma ahay ee waa la wadaagay ee sidaas maloo qeexay?

Xornimaa la qaatay, dumarkuna waa u mashxaradeen waana bogaadiyeen. Waxaa ku filnaatay halgankoodii inuu mirodhalay. Maxaa loogu abaal-guday? Ma la qiray dumar wuxuu galo iyo wuxuu gudo? Dadaalkoodii mala qiimeeyey? Xubintii maamulka dawladnimo ay xaqa u yeesheen mala siiyey? Nafti-hurenimadoodii mala taariikheeyey?

Siiba Gobollada Koofureed, dumarku waa dadka barkiise, haddayna ka badnayn, ee miyaa taas la inkiri karaa? Cadkii Dumar lahaa waa la saabiley oo waxaa la siiyey broo-talyan. Gorgortan gumaystuhu la yimid baa keentay in jaalkoodii meelo lagu gufeeyo, dawladda Talyaaniguna ay kabto dawladda dalaandalka ah ee Soomaaliyeed. Dawladnimadii la qaatay dumar waa ku hungoobay, Iyaguna uma codayn ragna wax uma garan. Tagta daayo timaadda qabo, baa hal kudhagga raggu noqday. Caddaalad sugiddii dawladeed alif bay ka xumaatay, dibna looma sixin...! Hadda goori goor ma tahay in xaqa la sugo? 

Rag Keliyuhu Caddaalad Ma Dhalin Karaa?

Siiba Gobollada Koofureed, kaalintii dumar soo cayaaray iyo mirihii dawladnimada ay ku yeesheen rag baa wada qaybsaday. Raggii shalay xornimada hortaagnaa oo gumaysi kalkaale ahaa baa ka sokemaray kuwii mudanka u lahaa inay maamulka dawladeed ka qayb-qaataan. Kuwii Shalay horseedka xornimo-doonka dhabarka ka tumaatiyi jirey baa loo dhiibay kafaddii caddaaladda. Dumar waa quustay waana iska qaanacay. War maxay ku dambayn ba dumar halqabsi u noqotay ilaa maantada aynu joogno. 

Dumarka & Kacaankii 21dii Aktoobar  

Dawlad Kacaan ah baa dalka ka dhalatay, waxayna qaadatay nadaamka hantiwadaagga, kaasoo fara sinaanta dabaqadda bulshada. Waa