In Doorashada heerkan soo gaarto nimanbaa abaalkeeda leh
Haddaba aqristoow bal aan kaaga sheekeeyo meesha sidii wax uga dhaceen.
Waxaa soo degay Imaamyo, Salaadiin, Isimmo, Garaadyo, Ugaasyo, Malaaqyo, Wabarro, Boqoro. Magacyadani idinkuma cusba aad baa loo qadariyaa. Sheeko yaroo oo dhex martay golayaashii dhaqanka, dadkii dalbaday iyo qaabka shaqadu ku socoto ayaan idiinka sheekaynayaa ee bogasho wacan:
Suldaan Colujoog: War heedheh, maxaa meesha naloogu soo xareeyey? Dadadkase nalaga rabo inaan soo xulno saw kuwa dalka iyo dibaddiisa jooga maaha? Sidee wax loo wadaa waqtigu naguma filnee.
Suldaan Jalafsade: Waxaan ku weydiiyey, adigu kumaad jirin miyaa qoladii mayiike siminaarka u furay, dadka la xulayo maxaa ka galay, meeshan lacag ayaa la kala boobayaa, dadkaasi waa diyaarsan yihiin, adigu siday kuu kala xigaan ama aad u kala jeceshahay farta ugu taag jufadiina.
Suldaan qabshax: Anigu waxaan garan la’ahay Soomaalidu Suldaammo badana, awal ma intan oo Ugaas iyo Suldaan ayaan lahayn? Anigu kuwan barashadooda ayaan ku mashquulay iyo inaan kala ogaado reeraha ay madax dhaqameedka u yihiin.
Ugaas Dakharre: Hayaay, yaa is gaadhay, war qaar badan ayuu basku ka buuxsamay, oo diyaaradaha boos ka waayey, oo iminka miyaadan ogayn Salaadiin ma jirtee waa Cuqaashii oo dallacday, jagooyinka ugu fudud dalka miyaad taqaana?.
Garaad xaange : Maya Ugaas, ee noo sheeg, aniga qudhaydaa la yaabay waxaan oo madax dhaqameeda hadday dalka joogaan maxay ummadda u dhex geli waayeen, oo ay u kala saari waayeen? Maxayse yihiin jagooyinkan?
Suldaan Colujoog: Anigaa kuu sheegaya Garaad, ee mid walba weydii haddii uu ku yidhaahdo magaciisa sadex Isim oo is dabayaal waa original, haddii uu Suldaan hebel hebel hebel ku yidhaahdo, oo kuwa kale aysan Suldaamo iyo Garaadyo iyo Imaamyo ahayn ama Malaaq Malaaq dhalay uusan ahayn waa koobi maya, waaba bug [Falso] oo inagaa laynagu xumaynayaa.
Suldaan Xoogsade: Sidaa ha odhan Colujoogoow, dadkii way bateen reerkii shalay lahaa Suldaanka qudhana, maanta waxay leeyihiin koox Suldaamo ah, teeda kale Soomaalidu waa kala xeer dhinaca hogaanka dhaqanka, qolana way is dhashaa, qolana waa hoggaan dimoqraadiya, oo maalinba ninkii reerka wadi kara ayaa loo dhiibaa, marka dee beeshaada ha ku salayne, kala baro dadka, oo ma lagu duubay dheh? Mise adigaa is duubay?.
Suldaan Bullow: horta qolaba maalinbay hogaan samaysataa aniga usbuucii hore
Ayaa lay duubay waxaana balan qaaday inaan waajibkayga guto oday soomaaliyeedna waa ahay Jabuuti laba jeer ayaan ka qayb galay, kenya waan tegay Adis iyo qaahira waa ka qayb galay intaas odaynimaan uga qayb galay maanta reerkaa ii igmaday inaan Suldaankooda noqdo marka maalinba ninbaa nasiib u yeesha in la duubo ee yaan lays gadafeeyn.
Salaadiintii ayaa midba meel talada ku dhuftay, iyada oo lays fahmi la’yahay ayaa mid ka dhex kacay
Suldaan Tahar: War cibaadada badiya iyo Alle bariga, nimankii dadka qarxin jiray waa isu soo dhawaanay, wax badan ayaa BBC-da ka dhagaysateen, maantase waxaan joogna meelahay wax ku qarxin jireen.
Suldaan Gobdoon: Arreey adigay mindhaa beriga kuugu horreysaa, annaga kuwaas kama cabsoonee Suldaan gobonimo doon ayaa naqanaysaa, Taallana waa lagu dhisaa, haddii lagu qarxiyee ee xaad la cabsahee, cimriyaadba tahee? Cibaado wax xun maaha mug kasta iska cibaadayso.
Halkaa markay sheekadii maraysay, oo qosol loo wada daatay, ayaa waxaa soo dhacay telefoon uu lahaa Suldaan khuurshe, dhaalam dhalalaamam dhalaalaam.
Suldaan khuurshe : Hello, waa kuma?
Axmed yare: Adeer waa wiilkaagii Axmed, ee walaalkaa dhalay waa Agoonkii, ee hawl baan kaa lahaaye, ii warran?.
Suldaan Khuurshe: Adeer siminaar baan ku jiraa, ee hadhoow igu soo celi, waxaan la fadhiyaa Madaxdii ku meelgaadhka iyo madaxdoodii (Mayiike) hadhoow igu soo celi, Maandhoow.
Axmedyare:Adeer xagee joogtaana, ma gurigii? Mise meel kale?.
Suldaan Khuurshe: Adeer Xamar baan joogaa, waxaan saxeexayaa Dastuurka Soomaaliya.
Axmed yare: Subxaanallaah! Adeer hawshaas anigaa barta waxay u baahan tahay qof sharci yaqaana, qof walba ma khusayso, adiga oo aan waxba qorin waxna aqriyin ayaa iigu kaa danbaysay, gadaashay ma waxbaad baratay?.
Suldaan Khuurshe: Adeer dowladdaa noo yeedhay, waa runtaa sidii aad igu ogayd baan ahay, waa naloo aqrinayaa, marka naloo aqriyo, dee dhego aan ku maqalno iyo maskax aan ku garanoba waan leenahay, markaas ayaan soo xulaynaa guddi saxeexda.
Axmedyare: Adeeroow waxaadan aqoon haysku saxeexin, dadkana dhib haw horseedin, nin nabadeed, Suldaan Suldaan dhalay oo daacada baad tahaye, iska ilaali waxaas oo kale ama qof aqoon leh u wakiilo, oo aqoonteeda leh.
Suldaankii khadkaa ka go’ay shakina waa galay, ka dib ayaa mid kale weydiiyey; yaa kula soo hadlayey? Waxuu yidhi ; waa mid yaroo walaalkay dhalay oo dibadahaa jira, ninka reerka oo dhan iga kafaala qaaday, wuxuu barta Qaynuunka iyo Sharciyada, waxuu igu yidhi; hawsha aad waddaan waa Qatar! Waan shakiyey Malaaq Tuuroow
Malaaq tuure : Aniga saaxiib hore ayaan u shakisnaa, hadda aniga dadka aan soo xulaayo dad aan sharci aqoon ma keenayo 9 Abuukaate [Qareen] ayaan beesha ku jira, sagaalkaba waa keenaa, haddii ay dadka dhib u horseedaan, Ilaahay ayaa la xisaabtamayaa, waxaan ku dhihi lahaa wiilka hadduu sharciyada barto Asiga wac iyo kuwa kale ee yaqaan, sidaas ayaan dalka ku badbaadin karnaa, waxaana lagu kala ogaan karaa.
Suldaan qarboosh: Wacad Alle inaydaan aduunyadan ku noolaan karayn, hadalkiina baan dhagaysanayey, waxaad tihiin niman aan ogayn meesha laysla marahayo, war aniga beeshayadu 10 bay yeelanaysaa, kursi kasta waxaa lay gaaray 1500$ meeshana 2000$ ayaa layga siinayaa waa 17000$, guri haddee iga qabya ahaa oo aan qarash u waayey iyo Barkad iga jaban ayaan ku samaysanahayaa, dalkan ha la iibsado ama ha lala wareego, waxba igama gelin, Ina Adeer meeshay doonaan ha geeyaan.
Ugaas Dhuxul : Innaa lillaah waa inaa ilayhi raajicuun, ninka sidaa u hadlayaa, Aabihii waxuu ahaa raggii gobonnima doonka ku dhintay, isagiina caloosha iyo cunaha maahee meel kale waxba ka fahmi maayo! War intaynaan cid kale matelin qoladeena hogaamiya dhaqameedka ah aan is xallino, oo is kala saarno, Wallaahay waa laysku dhex jiraaye.
Ugaas Nageeye: Arreey maqal Barkadaa iga qabya ku lahaa, xaad barkad ka sheegee dalkii dhammaa ayaa masuuliyaddiisa lagu saaray, adna gurigaaga ayaad ka sheekayhee, war Ilaahay ka cabso, oo waxii laydinku xaman jiray yaanay idinka soo bixin, ceeb waaye waxaasi.
Wabar Digaale: Anniga sheeko macquula ayaan idiin hayaa, horta aniga aqoon waa leeyahay, Ilaahay ayaa i baray, haddii maaddi tahay iyo haddii diini tahay, sheekadaan ma nuurayso, saaxiibayaaloow aan samayno urrur, maanta ha lagu dhawaaqo Golaha Guurtida Soomaaliland camal ah, meesha waa billaabatay yaan dib loo naqanin, haddii kale annaga wax oo markii loo baahdo la isticmaalaayo, hadhoowna iska baxa la dhahaayo maan nahay? Waa inaan urur ku dhawaaqnaa.
Suldaan Caagane: Qoodhiyo Xero Wabaroow waad asiibtay iminkadaas ayaan niyadda ku hayay Golaha dhaqanka iyo Umadda Soomaaliyeed G.DH.U.S. ayuu noqonayaa Mayiikena aan u sheegno, meeshana yaan looga kala kicin, illeen innagu ma nihin dabarkii marka lo’da la lisayo la isticmaali jiray, marka danbena layska tuuri jiray, yaan laynagu Awr kacsane, aan danteena garano, oo aan hoggaanka iyo masiirka dalka talo joogta ah ku yeelano, oo aan baarlamaankan iyo madaxtooyadan iyo golaha wasiirrada noqono kuwa ugu sarreeyaa qolyaha culumada ahna qaar baan ka soo qaadanaynaa Inshalaah.
Boqor Jeyte: Aniga Filinkaas ayaa igu socda, waa inaan meesha dib looga noqon, ee aan Gole ku dhawaaqnaa Golaha wax Garadka iyo Guurtida Umadda Soomaaliyeed G.G.U.S. waana feker wanaagsan.
Sheekadii waa dhabaqday, Golihiina xal ayuu u baahan yahay, nin la sugayoow adna yaad sugi waa Soomaali iyo xaalkeed, balse, qaybaha danbe ayaan sugaynaa xulashada xubnaha Soomaaliya xalkeeda gacanta loo geliyey qaabka ay ka yeelaan iyo sida loo soo xulo la soco qaybaha hadhay …………………….
Qalinkii: Cabdiraxiin Hilowe Galayr - Galayr1977@hotmail.com
Mas
Add comment
Comments