Muqdisho: Nin hubeysan oo laayay Qoys uu Gabar ka qabey

Dadka deriska la ahaa reerka la weeraray ayaa sheegay in dilaaga uu goobta isaga baxsaday kahor inta Ciidanka Dowladda soo gaarin.

Warar Keydmedia Online
9 July 2020

MUQDISHO, Soomaaliya - Dhacdo laga argagaxay, oo xanuun badan ayaa xalay ka dhacday duleedka magaaladda Muqdisho.

Nin ku hubeysan qoriga AK-47 ayaa weerar ku qaadey guriga reerka ay ka dhalatay Xaaskiisa, waxuuna laayay haween iyo caruur oo rasaastii uu guriga ku furey ku dhintay.

"Runtii aad baa looga naxay dhacdadan, oo ahayd mid ku cusub xaafadda Tabeellaha Sheekh Cabdi, ma garanayno sababta ninkaan u laayay reerkii uu gabadha ka qabey, laakiin waxaa naloo sheegay inuu khilaaf hoose jiray," ayuu yiri qof kamid ah dadka degaanka, oo Keydmedia Online la hadlay.

Ugu yaraan 4 qof ayaa la sheegay inay ku dhinteen weerarka, islamarkaana ay ku dhaawacmeen 5 kale oo dumar iyo Caruur ay ku jiraan.

Ninka falkan foosha xun geystay ayaan wali gacanta lagu soo dhigin, maadaama uu baxsaday waxyar kadib markuu dadka laayay.

KEYDMEDIA ONLINE