Abiy Axmed oo Wafdi u diray Somaliland

Abiy Axmed ayaa qoraal ku qoran Af-Soomaali soo dhigay Maanta bartiisa Twitter-ka, isagoo sheegay inuu garab taagan yahay dadkii xoolahooda ku uwaayay dabka.

Warar Keydmedia Online
2 April 2022

HARGEYSA, Soomaaliya - Wafdi ka socda dawladda Federal-ka Itoobiya oo uu hoggaaminayo Wasiirka Maaliyadda dalkaas, Axmed Shide ayaa Maanta gaarey magaaladda Hargeysa.

Axmed Shide iyo wafdigiisa ayaa tagey goobta Suuqa Waheen, oo xalay dabkii ka kacay uu burburiyay in ka badan 2,000 oo goob oo ganacsi, waxaana ku gubtay hanti malaayiin dollar dhan.

Ra'iisul Wasaare Abiy Axmed ayaa Maanta qoraal uu bartiisa Twitter-ka soo dhigay ku sheegay inay dowladdiisa garab taagan tahay Somaliland xiligan adag ee musiibadda ku dhacday.

Waxaannu u sheegaynaa inaannu garab taagannahay Waqtigan aad ka u adag. Waxaanu Eebbe ka rajaynaynaa inuu Khasaarahaas dheef ugu beddelo xilligan aannu ku jirno Bisha barakaysan ee Ramadaan. Eebbe ayaa inna leh, xaggiisana weynu ku-noqonayaa,' ayuu yiri Abiy.

Axmed Shide ayaa la kulmay Madaxweyne Muuse Biixi, oo u gudbisay fariinta uu ka wadey Abiy Axmed, waxaana isla maanta dib ugu laabtay Addis Ababa, oo markii hore kasoo duulay.

Itoobiya ayaa si dhaw u taageerta Somaliland oo kala dhaxeeyo xiriir ganacsi iyo mid amni, waxayna Addis Ababa saami 19% ku leedahay dhaqaalaha Dekadda Berbera ee DP World maalgelisay.

KEYDMEDIA ONLINE