Carruur ku dhimatay fatahaad uu sameeyay Webiga Shabeelle

Webiga Shabeelle ayaa inta badan fatahaad ka sameeya meelo badan oo ka mid ah gobolada dalka xilli roobaadka.

Warar Keydmedia Online
19 July 2020

MUQDISHO, Soomaaliya – Webiga Shabeelle ee mara deegaanno iyo degmooyin ka tirsan gobolada dalka ayaa fatahaad xooggan ka sameeyay Degmada Afgooye iyo tuulooyinka hoostaga ee ka tirsan Shabeelaha Hoose, maadaama xilli roobaad lagu jiro.

Fatahaadda ayaa la sheegaya in uu Webiga ka geystay xaafadaha Baalguri, Raqayle, siigaale, Damaleey iyo tuulooyinka Shukurow, Dhajaleey, Balbaleey, Mareereey, Mooradiile, Baladul-Amiin iyo Sabiid & Caanoole oo dhamaantood hoostaga degmada Afgooye ee gobolka Shabeellaha Hoose.

Guddoomiye ku-xigeenka Arrimaha Bulshada degmada Afgooye ee gobolka Shabeellaha Hoose Maxamed Nuur Gaabow ayaa sheegay in labo carruur ah ay ku geeriyoodeen fatahaada uu Webiga ka sameeyay xaafada Baalguri, sidoo kalena ay ku barakaceen Qoysas badan oo halkaas ku noolaa.

Webiga Shabeelle ayaa inta badan fatahaad ka sameeya magaalooyinka iyo Tuulooyinka uu dalka maro, ilaa hadana majirto cid masuuliyad iska saartay xakameynta fatahaada oo loo sababeynayo biyaha xad-dhaafka ah ee roobabka ka dhasho.

KEYDMEDIA ONLINE