Qoor Qoor iyo Cabdiraxmaan Cabdishakuur oo Muqdisho ku kulmay

Waa kulankii ugu horreeyay oo ay yeeshaan labadaan mas'uul tan iyo markii la doortay Madaxweyne Qoor Qoor February 2020. 

Warar Keydmedia Online
5 August 2020

MUQDISHO, Soomaaliya - Madaxweynaha Galmudug Axmed Cabdi Kaariye Qoor Qoor iyo siyaasiga Cabdiraxmaan Cabdishakuur Warsame ayaa xalay ku kulmay magaalada Muqdisho, waxayna isla gorfeeyeen xaaladda dalka iyo arrimaha Galmudug.

Kulanka ayaa ka dhacay hoyga Qoor Qoor uu Muqdisho ka deganyahay.

Qoraal uu bartiisa Facebook soo dhigay Cabdiraxmaan Cabdishakuur ayuu ku sheegay in shirka uu ahaa mid taalo wadaag ah, iyadoona looga hadlay xaaladda guud ee dalka iyo sida ay Galmudug ugu guuleysan laheyd qabsoomidda shirka Dhuusamareeb 3.

"Waxaan caawa kulan talo wadaag ah yeelanay Madaxweynaha Galmudug Mudane Axmad Cabdi Kaariye (Qoorqoor). Waxaan ka wada hadalnay guud ahaan xaalada siyaasadeed ee dalka, gaar ahaan Galmudug iyo sida ugu haboon ee uu ku guulaysan karo shirka Dhuusmarreeb 3." ayuu Cabdiraxmaan ku yiri qoraalka uu soo dhigay bartiisa Facebook.

Qoor Qoor, ayaa tan iyo markii uu Muqdisho soo gaaray todobaadkii lasoo dhaafay kulamo la yeelanayay siyaasiyiinta, Xildhibaanada, Wasiirada iyo xubnaha katirsan Beesha Caalamka ee Muqdisho degan.

KEYDMEDIA ONLINE