Sheekh Shariif oo Baydhabo kula kulmay Lafta Gareen

Guddoomiyaha Midowga Musharrixiinta xilka Madaxweynaha Soomaaliya Sheekh Shariif Sheekh Axmed iyo Wafdi ballaaran uu hoggaaminayo ayaa Maanta oo Khamiis ah si weyn loogu soo dhaweeyey magaalada Baydhabo ee Xarunta Maamulka Koonfur Galbeed Soomaaliya.

Warar Keydmedia Online
26 November 2020

BAYDHABO, Soomaaliya - Magaaladda Baydhabo waxaa Maanta gaarey wafdi uu hogaaminayo Madaxweynihii 7aad ee Soomaaliya Sheekh Shariif, oo dhawaan loo doortay gudoomiyaha Midowga Musharxiinta u tarmaya Xilka Madaxweynaha February 8, 2020. 

Sheekh Shariif Sheekh Axmed iyo wafdigiisa ayaa shir kula qaatey Xarunta Madaxtooyada Koonfur Galbeed Madaxweyne C/cassis Xasan Maxamed (Lafta Gareen) iyo mas'uuliyiin kale oo katirsan Maamulka.

Socdaalka Sheekh Shariif ee Baydhabo, ayaa qeyb ka ah ololihiisa doorashadda, isagoo dhawaan labo jeed tagey magaaladda Jowhar, ee xarunta maamulka Hirshabeelle xiligii doorashooyinka ay ka socdeen.

Lafta Gareen ayaa lagu tirayaa Madaxda ku dhaw Farmaajo, iyadoo doorashadiisii December 2018 ay ahayd mid Villa Soomaaliya isaga ugu hiilisay kadib markii ay xirtay Musharaxii loo saadaalinayay guusha Mukhtaar Roobow.

Musharxiinta ayaa maanta soo saarey war-murtiyeed ka kooban 18 qodob, oo ay ugu muhiimsan yihiin inuu Farmaajo kala diro gudiyadda doorashooyinka aan dhex-dhexaadka ahayn, inuu xilka ka qaado Fahad Yaasiin iyo inuu Ciidanka DF kasoo saaro Gedo.

KEYDMEDIA ONLINE